संदिप सुरडकर नागपुर जिल्हा प्रतिनिधी
महाराष्ट्र संदेश न्युज ! ऑनलाईन नागपूर:- येथून एक खळबळजनक घटना समोर आली आहे. येथील वाडी पोलिस स्टेशनच्या हद्दीत येणाऱ्या आंबेडकर नगर येथे एका सुरक्षारक्षक असलेल्या पतीने आपल्याच पत्नीच्या चारित्र्यावर संशय घेत, तिचा गळा चिरून निर्घृण हत्या केली. ही घटना दिनांक 27 ऑगस्ट रविवारी समोर आली आहे. प्रणाली ललित दहाट वय 34 वर्ष असे हत्या करण्यात आलेल्या महिलेचे नाव असून ललित रामदास दहाट वय 38 वर्ष असे आरोपी पतीचे नाव आहे.
पोलिसांनी दिलेल्या माहितीनुसार, आरोपी ललित दहाट हा परिसरातील शिकारा बारमध्ये सुरक्षारक्षक म्हणून काम करतो. प्रणाली आणि ललित या दोघांनीही आपल्या पहिल्या पती आणि पत्नीशी घटस्फोट घेतला होता त्यानंतर दोघांनच एकमेकांवर प्रेम असल्याने त्यांनी सहा महिन्यांपूर्वी मंदिरात जाऊन विवाह केला होता. मात्र, लग्नानंतर काही दिवसात ललित हा प्रणालीच्या चारित्र्यावर संशय घेऊ लागला. त्यामुळे त्यांची भांडणेही व्हायची. दरम्यान तो पत्नीला मारहाण करायचा. 25 ऑगस्टला प्रणाली माहेरी वर्धा येथे गेली. रविवारी सकाळी 8 वाजताच्या सुमारास ती वर्धेहून नागपुरात आली. यावेळी रहाटे कॉलनी चौकात उतरली. ललित हा तिला घ्यायला गेला. 8.30 वाजताच्या सुमारास तो घरी आला. घरी परतल्यानंतर दोघांत वाद झाला. रागाचा भारात ललितने धारदार शस्त्राने गळा चिरून प्रणालीची हत्या केली. हत्या केल्या नंतर घराला कुलूप लावून ललित पसार झाला.
यानंतर आरोपी पतीने आपल्या नातेवाईक व एका पोलिस मित्राच्या मोबाइलवर संपर्क साधून आपल्या पत्नी प्रणालीची हत्या केल्याची माहिती दिली. यावेळी पोलिस मित्राने वाडी पोलिसांना याबाबत माहिती दिली ही माहिती मिळताच पोलिसांचा ताफा घरीजवळ पोहोचला.
पोलिसांनी दरवाजा तोडून आत प्रवेश केला असता, प्रणालीचा मृतदेह रक्ताच्या थारोळ्यात पडलेला आढळला. पोलिसांनी तत्काळ मृतदेह मेयोत रवाना केला. याप्रकरणी हत्येचा गुन्हा दाखल करीत, पोलिसांनी आरोपी पतीचा शोध घेण्यास सुरुवात केली. त्यानंतर काही तासातच त्याला पोलिसांनी वाडी परिसरातून अटक केली.
