पंकेश जाधव पुणे ब्युरो चिफ 7020794626
महाराष्ट्र संदेश न्युज ! ऑनलाईन पुणे:- पुण्यात लाचखोरीच्या घटनेत उधाण आले आहे. अशीच एक घटना शिवाजीनगर दिवाणी न्यायालयातून समोर आली आहे. शिवाजीनगर दिवाणी न्यायालयातील एका कर्मचाऱ्याला 1 हजार रुपयांची लाच घेताना लाचलुचपत प्रतिबंधक विभागाने शुक्रवारी (दि.1) रंगेहाथ अटक केली आहे. लक्ष्मण नथू काळे वय 40 वर्ष असे लाचखोर कर्मचाऱ्याचे नाव आहे.
तक्रारदार महिलेने जमिनीच्या वादासंदर्भात शिवाजीनगर न्यायालयात दावा दाखल केला आहे. या दाव्यात प्रतिवादी व्यक्तीला न्यायालयाने हजर राहण्यासाठी समन्स बजाविण्याची जबाबदारी काळे याच्यावर सोपविण्यात आली होती. समन्स वेळेत बजावून याबाबतचा अहवाल न्यायालयात सादर करण्यासाठी काळे याने महिलेकडे एक हजार रुपयांची लाच मागितली होती.
पण महिलेला लाच द्यायची नसल्यामुळे महिलेने लाच लुचपत प्रतिबंधक विभागात फिर्याद दिली होती. याप्रकरणी काळे याच्यासह आाणखी एकाविरुद्ध लाचलुचपत प्रतिबंधक कायद्यान्वये गुन्हा दाखल करण्यात आला आहे.
महिलेकडून तक्रार प्राप्त होताच लाचलुचपत प्रतिबंधक विभागाने शिवाजीनगर न्यायालयाच्या परिसरात सापळा लावून काळे याला महिलेकडून एक हजार रुपयांची लाच घेताना पकडले. पोलीस अधीक्षक अमोल तांबे, अतिरिक्त अधीक्षक डॉ. शीतल जानवे यांच्या मार्गदर्शनाखाली ही कारवाई करण्यात आली.
