नरेंद्र नायडू पुणे शहर प्रतिनिधी
महाराष्ट्र संदेश न्युज ! ऑनलाईन पुणे:- पुण्यात गुन्हेगारी वाढत आहे. त्यात आता महाविद्यालयतून चंदन चोरीच्या खळबळजनक घटना समोर आली आहे. पुण्यामध्ये चंदन चोरीच्या घटना वाढल्या असून या चोरांनी उच्छाद मांडला आहे. शहरामध्ये चंदन चोरीच्या घटना दिवसेंदिवस वाढत असून खासगी संस्था, कॉलेज आणि कंपनी परिसरातील चंदनाच्या झाडांवर या चोऱांच्या नजरा आहेत. रात्रीच्या शांततेचा फायदा घेत चोर संस्थांमध्ये घुसत आहेत. शहरातील कर्वेनगर भागातील महर्षी कर्वे स्त्री शिक्षण संस्थेच्या आवारातून चंदन चोरी केल्याची घटना आता उघड झाली आहे. या प्रकरणी आशिष पवार यांनी वारजे माळवाडी पोलीस ठाण्यात फिर्याद दिली आहे.
पुणे शहरातील महर्षी कर्वे स्त्री शिक्षण संस्थेच्या आवारामध्ये असणारे चंदनाचे मोठे झाड हे चोरटयांनी कापून नेले आहे. मध्यरात्रीच्या सुमारास चोरटे हे संस्थेच्या आवारात शिरले आणि करवतीचा वापर करत चंदनाचे झाड कापले. फिर्यादी पवार हे महर्षी कर्वे स्त्री शिक्षण संस्थेचे सुरक्षा अधिकारी आहेत. संस्थेच्या आवारातील चंदनाचे झाड कापून नेल्याचा प्रकार उघडकीस आल्यानंतर पोलीस तक्रार करण्यात आली असून या चोरीमुळे सर्वांच्या भुवया उंचावल्या आहेत. महर्षी कर्वे स्त्री शिक्षण संस्थेच्या आवारातील या चंदन चोरी प्रकरणाचा तपास पोलीस उपनिरीक्षक जवळगी करत आहेत.
पुणे शहरात मागील आठवड्यामध्ये देखील खडकीतील किर्लोस्कर कंपनीच्या आवारामधून चंदनाचे झाड चोरट्यांनी कापून नेले. यावेळी सुरक्षारक्षक आणि चंदन चोर यांच्यामध्ये झटापट देखील झाली होती. आता पुन्हा एकदा शहरामध्ये चंदन चोरीची घटना समोर आली आहे.
