पल्लवी मेश्राम, नागपुर शहर प्रतिनिधी
महाराष्ट्र संदेश न्युज ! ऑनलाईन नागपूर:- जिल्हातील शेकडो ग्रामपंचायत निवडणुकीचे निकाल सोमवारी जाहीर झाले. या ग्रामपंचायत निवडणुका जरी पक्षचिन्हांवर झाल्या नसल्या तरी राजकीय पक्षाचे समर्थक गट त्यात सहभागी होतात व त्यांचा जय-पराजय हा संबंधित पक्षाचा मानला जातो.
या ग्रामपंचायत निवडणुकीत एक खळबळजनक माहिती समोर आली आहे. भाजप नेते व केंद्रीय मंत्री नितीन गडकरी यांचे गाव असलेल्या धापेवाड़ामध्ये काँग्रेस समर्थित गटाने १७ पैकी १० जागांवर विजय मिळवला. भाजप समर्थित गटाला सहा जागांवर समाधान मानावे लागले. धापेवाडामध्ये सरपंचपदासाठी काँग्रेस विरुद्ध भाजप समर्थित गटात थेट लढत झाली. त्यात कांग्रेस समर्थित मंगला शेटे यांनी भाजपा समर्थित उमेदवार निशा खडसे यांचा पराभव केला.
धापेवाडा हे गाव सावनेर तालुक्यात येत असून या मतदारसंघाचे प्रतिनिधीत्व कांग्रेस नेते आमदार सुनील केदार करतात. त्यांचा या भागात प्रभाव आहे. निवडणुकीपूर्वीही धापेवाड्यात काँग्रेस समर्थित गटाचीच सत्ता होती. या निवडणुकीत त्यांनी ती कायम राखली. नागपूर जिल्ह्यातील ३५७ ग्रामपंचायतीमध्ये रविवारी सरपंच व सदस्य पदासाठी ७९.४० टक्के मतदान झाले. सोमवारी तालुकास्तरावर मतमोजणी पूर्ण झाली.
नागपूर जिल्ह्यात ७० टक्के गावात भाजप समर्थित गटाचे सरपंच विजयी झाल्याचा दावा या पक्षाचे जिल्हाध्यक्ष व माजी आमदार सुधाकर कोहळे यांनी केला.
