प्रविण जगताप, वर्धा उपजिल्हा प्रतिनिधी मोबाईल 9284981757
महाराष्ट्र संदेश न्युज ! ऑनलाईन वर्धा, दि.7:- वर्धा विधानसभा मतदार संघाअंतर्गत नवमतदाराची मतदार नोंदणी वाढविण्यासाठी विशेष अभियान राबविण्यात येत आहे. या अभियानांतर्गत स्वस्त धान्य दुकानदारांमार्फत शिधापत्रिकांवर मतदान नोंदणी व मतदान जनजागृती करणारे स्टीकर लावून जनजागृती करण्यात येत आहे. या जनजागृती कार्यक्रमाचा शुभारंभ वर्धा विधानसभा मतदारसंघाचे मतदार नोंदणी अधिकारी दिपक कारंडे व उपजिल्हा निवडणूक अधिकारी अनिल गावीत यांच्याहस्ते करण्यात आला. यावेळी जिल्हा पुरवठा अधिकारी एस.बी.भराडी, तहसिलदार रमेश कोळपे, निरिक्षण अधिकारी प्रज्वल पाथरे, पुरवठा निरिक्षक महेश थेरे, पर्यवेक्षक व मतदान केंद्रस्तरीय अधिकारी उपस्थित होते.
वर्धा विधानसभा मतदार संघाअंतर्गत वर्धा तालुक्यातील 74 रास्तभाव दुकानातील 42 हजार 500 व सेलू तालुक्यातील 73 रास्तभाव दुकानातील 22 हजार 500 शिधापत्रिकांवर नवमतदार नोंदणी व आगामी काळात होऊ घातलेल्या लोकसभा व विधानसभा निवडणूकांसाठी सर्व मतदारांना मतदानाच्या अधिकारीची जाणीव व जनजागृती करणारे स्टिकर शिधापत्रिकेवर लावण्याची मोहिम सुरु करण्यात आली आहे.
सदर मोहिम दि.5 नोव्हेंबर पासुन सुरु करण्यात आली असून वर्धा विधानसभा मतदार संघातील सर्व नागरिकांनी आपल्या कुटूंबातील नव मतदारांची नोंदणी करुन नमुना 6 भरुन घ्यावे तसेच कुटूंबातील मयत व्यक्तींच्या नावाची वगळणी करीता नमुना 7 व जन्मतारीख, पत्ता दुरुस्ती करीता नमुना 8 भरुन घ्यावा. सदर कामारीता मतदान केंद्रस्तरीय अधिकारी यांची मदत घ्यावी, असे आवाहन मतदार नोंदणी अधिकारी दिपक कारंडे यांनी केले आहे.
