लाचखोर अधिकाऱ्याने 72 लाखाचा दंड कमी करण्यासाठी मागितले 10 लाख.
मधुकर गोंगले, गडचिरोली जिल्हा प्रतिनिधी
महाराष्ट्र संदेश न्युज ! ऑनलाईन गडचिरोली:- जिल्हातून एक खळबळजनक घटना समोर आली आहे. येथील आलापल्ली वनविभाग वनपरिक्षेत्र पेरमिली अंतर्गत बांधकामावरील पकडलेल्या वाहनावर थोटावलेल्या 72 लाखाचा दंड कमी करण्यासाठी 10 लाखाची लाच मागणाऱ्या वनपरिक्षेत्र अधिकाऱ्याला लाचलुचपत प्रतिबंध विभागाने रंगेहात अटक केली असून ही कारवाई ४ जानेवारी रोजी रात्री उशिरा पर्यंत करण्यात आली. प्रमोद आनंदराव जेणेकर असे लाचखोर अधिकाऱ्याचे नाव असून तो आलापल्ली वन विभागा अंतर्गत येत असलेल्या पेरमिली येथे वनपरिक्षेत्र अधिकारी म्हणून कार्यरत होता. या कारवाईने वनविभागात एकच खळबळ उडाली आहे.
तक्रारदार हा कंत्राटदार असून त्याचे पेरमीली वनपरिक्षेत्रात येत असलेल्या तुमरगुंडा ते कासमपल्ली पर्यंत रस्त्याचे काम सुरू होते. काही दिवसांपूर्वी या कामावरील वाहने वनपरिक्षेत्र अधिकारी प्रमोद जेणेकर यांनी पकडली होती. ती वाहने सोडवण्यासाठी व आकारलेले 72 लाखाचा दंड कमी करण्यासाठी त्यांनी तब्बल 10 लाखाच्या लाचेची मागणी केली होती. परंतु तळजोड अंती 5 लाख रुपये देण्याचे ठरले.
मात्र संबंधित तक्रारदाराला लाच देण्याची इच्छा नसल्याने त्यांनी या संदर्भात लाचलुचपत प्रतिबंधक विभागाकडे तक्रार केली. या अनुषंगाने 4 जानेवारी 2024 रोजी सापळा रचण्यात आला आणि यामध्ये वनपरिक्षेत्र अधिकारी प्रमोद जेनेकर याला 5 लाख रुपये स्वीकारताना रंगेहात पकडण्यात आले. यावेळी जेणेकर यांच्या पेरमिली येथील शासकीय निवासस्थानाची झडती घेतली असता 85 हजार रुपये रोख मिळून आली.
ही धडक कारवाई लाचलुचपत प्रतिबंध विभागाचे पोलीस अधीक्षक राहुल मानकीकर, अप्पर पोलीस अधीक्षक सचिन कदम यांच्या मार्गदर्शनाखाली गडचिरोली पोलीस अधीक्षक अनामिका मिर्झापुरे, पोलीस निरीक्षक श्रीधर भोसले यांच्यासह गडचिरोली लाच लुचपत प्रतिबंधक विभागाने केली. यामुळे वनविभागात एकच खरबळ उडाली असून लाचखोरी करणाऱ्यांचे धाबे दणाणले आहेत.
