पल्लवी मेश्राम, नागपुर जिल्हा प्रतिनिधी
महाराष्ट्र संदेश न्युज ! ऑनलाईन नागपुर:- महानगर पालिका येथून एक खळबळजनक माहिती समोर आली आहे. महानगर पालिकेच्या कर्मचाऱ्यावर गैरवर्तवणूक आणि गैरशिस्तीच्या कारणामुळे नागपूर महानगर पालिकेमध्ये कार्यरत दोन कर्मचाऱ्यांना निलंबित करण्यात आले आहे. महानगर पालिका आयुक्त तथा प्रशासक डॉ. अभिजीत चौधरी यांच्या निर्देशानुसार अतिरिक्त आयुक्त डॉ. सुनील लहाने यांनी मंगळवारी कर्मचाऱ्यांच्या निलंबनाचे आदेश जारी केले आहेत. निलेश सांबारे आणि रुपेश थुटे असे निलंबित कर्मचाऱ्यांची नावे आहेत.
निलेश सांबारे हे धंतोली झोनमध्येमध्ये उद्यान विभागात कनिष्ठ अभियंता या पदावर कार्यरत आहे तर रूपेश थुटे हे गांधीबाग झोनमध्ये कर संग्राहक पदावर कार्यरत आहेत. दोन्ही कर्मचाऱ्यांवर शिस्तभंगाची कारवाई करीत त्यांना सेवेतून निलंबित करण्यात आले आहे.
निलंबनाचा आदेश अंमलात असेपर्यंत निलेश सांबारे यांना मुख्य अभियंता सार्वजनिक बांधकाम विभाग तर रुपेश थुटे यांना उपायुक्त (महसूल) कर विभाग मनपा प्रशासकीय इमारत येथे उपस्थित रहावे लागेल. दोन्ही कर्मचाऱ्यांना अतिरिक्त आयुक्तांच्या पूर्वपरवानगी शिवाय मुख्यालय सोडता येणार नसल्याचाही आदेश निर्गमित करण्यात आला आहे.
