✒️मंगेश जगताप, मुंबई प्रतिनिधी
मुंबई:- भाईंदर येथील मिरा रोड येथून एक दुर्दैवी घटना समोर आली आहे. एका विवाहित महिलेने आपल्या पोटच्या 6 वर्षीय मुली बरोबर 6 मजली इमारतीच्या गच्चीवरून उडी घेऊन आत्महत्या केल्याच्या घटनेने सर्वत्र हळहळ व्यक्त करण्यात येत आहे. ही घटना आज दुपारच्या सुमारास घडली आहे. आत्महत्येचे नेमके कारण काय हे अद्याप स्पष्ट झाले नसून काशी मिरा पोलीस पुढील तपास करत आहेत.
मिरा रोड येथील शांती गार्डन भागातील नित्यानंद नगर येथील गौरव गॅलेक्सी या सहा मजली इमारतीत दुपारी अडीच वाजण्याच्या सुमारास ही दुर्दैवी घटना घडली. पोलिसांनी दिलेल्या माहितीनुसार इमारतीमधील सीसीटीव्ही मध्ये ही महिला आपल्या सहा वर्षांच्या मुलीला लिफ़्ट मधून गच्चीवर घेऊन जाताना दिसून आली आहे. त्यांनतर थोड्याच वेळात दोघींचे मृतदेह रक्ताच्या थारोळ्यात पडलेले सुरक्षा रक्षकला दिसून आले. त्याने याची माहिती महिलेच्या पतीला व पोलिसांना दिली.
दोघींना खासगी रुग्णालयात नेण्यात आले. मात्र डॉक्टरांनी त्यांना मृत घोषित केले. ही महिला आपल्या पती व सहा व तीन वर्षीय मुलींसह इमारतीच्या तळमजल्यावर रहात होती. घटना घडली तेव्हा महिलेची लहान मुलगी एकटीच घरात होती. आत्महत्येचे कारण अद्याप स्पष्ट झाले नसून काशी मिरा पोलीस पुढील तपास करत आहेत.