महाराष्ट्र संदेश न्युज ! ऑनलाईन जळगाव:- येथून एक खळबळजनक घटना समोर आली आहे. मुलीशी प्रेम विवाह केल्याच्या रागातून सासरच्या मंडळींनी आपल्याच 26 वर्षांच्या जावयाची निर्घृण हत्या केल्याच्या घटनेने महाराष्ट्र हादरला आहे. जळगाव शहरातील पिंप्राळा परिसरात असलेल्या हुडको परिसरात ही घटना घडली असून मुकेश शिरसाट हत्या करण्यात आलेल्या जावयाचं नाव आहे. आपल्याच मुलीचे आणि बहिणीचे कुंकू पुसणारे हत्यारे चुलत भाऊ, मामा आणि सासरच्या 7 नातेवाईकांना पोलिसांनी बेड्या ठोकल्या आहे, तर 3 संशयीत अद्यापही फरार आहेत. या हल्ल्यात मृतक मुकेश याच्या गर्भवती पत्नीवरही हल्ला करण्याचा प्रयत्न करण्यात आला, पण सुदैवाने ती यात बचावली आहे.
प्राप्त माहितीनुसार, जळगाव शहरातील पिंप्राळा परिसरात असलेल्या हुडको भागात राहणाऱ्या मुकेश शिरसाट या तरुणाचे आपल्याच भागात राहणाऱ्या पूजासोबत प्रेम संबंध जुळले, यानंतर दोघांनीही लग्न करण्याचा निर्णय घेतला, पण पूजाच्या परिवाराला यांचं लग्न मान्य नव्हतं. घरच्यांच्या विरोधात जाऊन पूजाने मुकेश बरोबर 4 फेब्रुवारी 2022 रोजी लग्न केलं.
मृतक मुकेश हा हातमजुरी करून आपले कुटुंब चालवत होता. विरोध झुगारून लग्न केल्यामुळे पूजाच्या माहेरच्यां कडून वारंवार वाद निर्माण केले जात होते. अनेकदा हे वाद पोलिसां पर्यंतही पोहोचले, पण कौटुंबिक वाद असल्यामुळे पोलिसांनी कठोर भूमिका न घेता या प्रकरणात दोन्ही कुटुंबांचा समन्वय साधण्याचा प्रयत्न केला.
प्रेम विवाहाचा राग पूजाच्या माहेरच्यांनी डोक्यात ठेवत अखेर मुकेशचा काटा काढला. यात पूजाच्या माहेरच्यांनी गर्भवती असलेल्या पूजावरही हल्ला करण्याचा प्रयत्न केला, मात्र सुदैवाने हल्ल्यात पूजा बचावली, असा आरोप पूजाने केला आहे.
मुकेश आणि त्याच्या सासरच्या नातेवाईकांचा 18 जानेवारीला संध्याकाळी वाद झाला, हा वाद मिटवण्यासाठी काहींनी प्रयत्न केला, मात्र रविवारी सकाळी 8.30 वाजता मुकेश कामासाठी घराबाहेर पडत असताना त्याच वेळी हातात लाठ्या काठ्या, धारदार शस्त्र घेऊन मुकेशच्या सासरचे काही लोक आणि त्यांचे सहकारी घरात घुसे आणि त्यांनी मुकेशवर हल्ला करायला सुरूवात केली.
मुकेशला वाचवण्यासाठी काही जण पुढे आले मात्र त्यांच्यावरही जमावाने हल्ला केला. मुकेशची गर्भवती पत्नी पूजा हिच्यावरही हल्ला करण्याचा प्रयत्न केला गेला, पण पूजाची नणंद वेळीच आल्याने गर्भवती असलेली पूजा या हल्ल्यात बचावली.
मुकेशची त्याच्याच घरासमोर सासरच्यांनी हत्या केल्यामुळे शहरात खळबळ माजली आहे. या घटनेत जखमी झालेल्या चार ते पाच जणांना जिल्हा सामान्य रुग्णालयात उपचारासाठी दाखल करण्यात आलं आहे. मुकेश आणि पूजा यांना 3 वर्षांची मुलगी आहे, तसंच पूजा ही गर्भवतीही आहे. अशा परिस्थितीमध्ये मुकेशची हत्या झाल्यामुळे कुटुंबावर दु:खाचा डोंगर कोसळला आहे. हल्लेखोरांना फाशीची शिक्षा देण्याची मागणी मुकेशच्या बहिणीने केली आहे.
