मुकेश चौधरी कार्यकारी संपादक
महाराष्ट्र संदेश न्युज ! ऑनलाईन हिंगणघाट:- देशातील भाजपशासित राज्यांमध्ये विरोधकांना किती द्वेषाने पाहिले जाते याची कल्पना संपूर्ण देशाला आहे. आपल्या महाराष्ट्रातही काही वेगळं घडत नाही. पण आता भाजपने अतिशय खालची पातळी गाठली आहे. भाजपचे आमदार, विरोधी पक्षाच्या नेत्यांच्या, पदाधिकाऱ्यांच्या, कार्यकर्त्यांच्या खासगी आयुष्यात नजर ठेवून आहे. ही बाब अत्यंत धक्कादायक व गंभीर आहे.कालपरवा पुण्यात एक रेडचे प्रकरण घडले. त्यात आमचे नेते एकनाथ खडसे यांचे जावई डॉ. प्रांजल खेवलकर यांना अडकवले गेले.
मागच्या आठवड्यातील हनी ट्रॅपच्या बातम्या पाहिल्या तर कोणत्या ‘संकटमोचन’वर संकट ओढावले होते, याची आपल्याही कल्पना आहे. त्यामुळेच तर हे कुभांड रचले गेले. मात्र यात भाजपाचे चाळीसगावचे आमदार मंगेश चव्हाण यांनी मीडिया समोर डॉ. प्रांजल खेवलकर यांचे खासगी Gmail अकाऊंट माध्यमांना समोर दाखवले. ड्राईव्हमधील खासगी गोष्टी बाहेर दाखवल्या. एखाद्या व्यक्तीची परवानगी न घेता त्या व्यक्तीच्या खासगी अकाऊंटमध्ये घुसून ते बाहेर प्रसारित करणे हा सायबर क्राईम तर आहेच शिवाय दडपशाहीचा नवा फंडा आहे.
आम्ही विरोधी पक्षात काम करणाऱ्या महिला आहोत. आम्ही विचारांना प्राधान्य दिले आहे. त्यामुळे कोणत्याही सत्ताधारी पक्षात न जाता निष्ठेने आदरणीय शरद पवार साहेबांसोबत काम केले आहे. मात्र आमदार मंगेश चव्हाण यांच्या कृतीमुळे आमच्यासाठी भीतीचे वातावरण निर्माण झाले आहे. उद्या यांच्या विरोधात बोलतोय म्हणून हे लोक आमच्याही फोनमध्ये घुसतील, आमचेही खासगी फोटो बाहेर दाखवतील, यांचा काहीही नेम नाही. लाडक्या बहिणींना फक्त निवडणुकी पुरता मान असतो याची कल्पना संपूर्ण महाराष्ट्राला आली आहे. त्यामुळे आमची भीती दूर व्हावी व आम्हाला सुरक्षित वातावरणात मिळावे यासाठी समोरची व्यक्ती आमदार आहे याचा विचार न करता, कोणी सायबर क्राईम करत असेल तर त्यावर गुन्हा दाखल करून एक वेगळा संदेश द्यावा अशी आमची मागणी आहे.असे निवेदन राष्ट्रवारी महिला काँग्रेस कडून हिंगणघाट पोलीस निरीक्षक मार्फत वर्धा जिल्हा पोलीस अधीक्षक यांना निवेदन देण्यात आले.
यावेळी राष्ट्रवादी महिला काँग्रेस शरदचंद्र पवार पक्षाचे हिंगणघाट शहर कार्यध्यक्षा सिमा तिवारी, जिल्हा सरचिटणीस सुजाता जांभुळकर, जिल्हा उपाध्यक्ष मिना सोनटक्के, विधानसभा उपाध्यक्ष विद्या गिरी, शहर सरचिटणीस अर्चना नांदूरकर, शहर उपाध्यक्ष दिपाली रंगारी, ओबीसी शहर अध्यक्ष आचल वकील, शहर सरचिटणीस सविता गिरी आदी उपस्थित होते.
