🖋️ महेंद्र कदम, संगमनेर तालुका प्रतिनिधी
संगमनेर : वाळू तस्करी हे समीकरण गेल्या काही वर्षांपासून घट्ट झाले आहे. महसूलमंत्र्यांनी कितीही कठोर कारवाईचे संकेत दिले, तरी स्थानिक तलाठ्यांच्या दुर्लक्षामुळे संगमनेर शहर हद्दीतील प्रवरापात्रातून भर दिवसा गाढवांच्या मदतीने वाळूतस्करी सुरू असल्याचे चित्र दिसून येत आहे.
संगमनेर शहर व तालुक्याच्या हद्दीतून वाहणारी प्रवरा नदी वाळूचोरांसाठी वरदान ठरत आहे. दर वर्षी प्रवरेला आलेला पूर मोठ्या प्रमाणात वाळू वाहून आणतो. संगमनेर शहर हद्दीसह धांदरफळ, मंगळापूर, कसारा दुमाला, जोर्वे, निंबाळे, तसेच म्हाळुंगी पात्रातून वाळूची रात्रंदिवस वाहतूक सुरू असते. वरिष्ठ अधिकाऱ्यांच्या आदेशानंतर काही वेळा थातुरमातूर कारवाई होते. मात्र शहर व परिसरातील उपनगरे, तसेच शहरालगतच्या गावांमध्ये सुरू असलेल्या बांधकामांसाठी मोठ्या प्रमाणात वाळू उपलब्ध होते.
शहरालगतच्या गंगामाई घाट परिसरातून तसेच संगमाजवळ, संगमनेर खुर्द परिसरातून जुनाट रिक्षा, ट्रॅक्टर ट्रॉली मधून वाळूचा उपसा सुरु असतो. सध्या नदीपात्रातील पाण्यातूनही वाळू काढून ती बांधकामाला पुरवण्याचा अखंड उद्योग महसूलच्या नाकावर टिच्चून सुरू आहे. यावर नियंत्रण असलेले स्थानिक तलाठी व महसूलची यंत्रणा वाळूतस्करी थांबवण्यात फारसा रस घेत नसल्याचे दिसत आहे.
संगमनेर शहराजवळच्या गुंजाळवाडीमधील आडमार्गाने, तसेच थेट अकोले बाह्यवळण रस्त्यानेही गाढवावरून वाळूवाहतूक सुरू आहे. विशेष म्हणजे भर दिवसा सुरु असलेल्या या प्रकारामुळे महसूल विभागाचा धाक संबंधितांना राहिला नसल्याचे दिसते आहे. मध्यंतरी नवनिर्वाचित महसूलमंत्री राधाकृष्ण विखे पाटील यांनी प्रवरानगर येथील आढावा बैठकीत अनधिकृत वाळू उपसा व खडी क्रशरबाबत कठोर भूमिका घेत कोणत्याही राजकीय दबावाला बळी न पडता दोषींवर गुन्हे दाखल करण्याचेआदेश महसूल यंत्रणेला दिले होते. मात्र तरीही याकडे संबंधित यंत्रणेचे दुर्लक्ष होत असल्याचे समोर आले आहे.
गाढवावरून व इतर कोणत्याच वाहनातून विनापरवाना वाळूची तस्करी हा गुन्हा आहे. कोणी अशी तस्करी करीत असेल तर त्यांच्यावर कारवाई करण्यात येईल. वाळू तस्करांवरील कारवाईत संगमनेर तालुका जिल्ह्यात अव्वल आहे. :अमोल निकम,तहसीलदार, संगमनेर
