महाराष्ट्र संदेश न्युज ! ऑनलाईन मुंबई:- बॉलीवूडचा आघाडीचा अभिनेता सलमान खान याला पाकिस्तान सरकारने ‘दहशतवादी’ घोषित केलं आहे. यामागचं कारण म्हणजे सलमान खान याने सौदी अरेबिया येते आयोजित करण्यात आलेल्या एका कार्यक्रमात बलुचिस्तान बद्दल वक्तव्य केले होते. या कार्यक्रमात सलमान खानने पाकिस्तान आणि बलुचिस्तान यांचा वेगवेगळा उल्लेख केला. यामुळे पाकिस्तान सरकारला चांगल्याच मिरच्या झोंबल्या आहेत. या वक्तव्यानंतर नाराज झालेल्या पाकिस्तानच्या शाहबाज सरकारने एका अधिकृत अधिसूचना जारी करत सलमानला थेट दहशतवादी म्हणून घोषित केलंय.
पाकिस्तान सरकारने सलमान खान यांच्यावर दहशतवाद विरोधी अधिनियमांतर्गत कारवाई केली आहे. यासोबतच सलमान खान यांचं नाव फोर्थ शेड्युलमध्ये टाकलं आहे. याचा नेमका अर्थ काय असतो आणि पाकिस्तानी पोलीस सलमानला अटक करू शकते का, त्याबद्दल जाणून घेऊयात..
काय असते पाकिस्तानची फोर्थ शेड्युल यादी?: पाकिस्तान सरकारने 1997 च्या दहशतवाद विरोधी कायद्यांतर्गत फोर्थ शेड्युलमध्ये दहशतवादी किंवा अतिरेकी कारवायांमध्ये सहभागी असल्याचा संशय असलेल्या व्यक्तींची यादी आहे. या यादीत समाविष्ट असलेल्यांना पाकिस्तानमध्ये प्रवास करण्यास निर्बंध लाऊन मनाई करण्यात येते. त्यांची पाकिस्तान मध्ये असलेली सर्व मालमत्ता गोठवली जाते आणि त्यांच्यावर कडक पाळत ठेवली जाते. परंतु ही देशांतर्गत कायदेशीर तरतूद असल्याने फक्त पाकिस्तानातच हे नियम लागू होतील.
आंतरराष्ट्रीय कायदा काय म्हणतो?: आंतरराष्ट्रीय कायद्यानुसार, सीमापार अटक केवळ इंटरपोल रेड नोटीससारख्या अधिकृत कायदेशीर यंत्रणेद्वारेच केली जाऊ शकते. ही अटक केवळ दहशतवाद किंवा युद्ध यांसारख्या गंभीर जागतिक गुन्ह्यांशी संबंधित प्रकरणांमध्येच केली जाऊ शकते. शिवाय कोणतीही कारवाई करण्यापूर्वी विश्वासार्ह आणि ठोस पुरावे सादर करणं आवश्यक आहे. पाकिस्तानने सलमानला जरी दहशतवादी म्हणून घोषित केलं असलं तरी ही कारवाई त्याच्या फक्त वक्तव्यावर आधारित आहे, कोणत्याही गुन्हेगारी कृतीवर नाही.
