राजश्री ढमाळ सातारा जिल्हा प्रतिनीधी
सातारा :- ता. २२ : महर्षी कर्वे स्त्री शिक्षण संस्थेच्या साताऱ्यातील कन्याशाळेच्या शताब्दी वर्षाचा सांगता समारोह गुरुवारी (ता. २४) सकाळी ११ वाजता होत आहे. या समारोहास प्रमुख अतिथी म्हणून लेखिका अरुणा ढेरे उपस्थित राहणार असल्याची माहिती कन्याशाळेच्या शालेय समितीचे अध्यक्ष दत्ताजी थोरात व मुख्याध्यापिका सुरेखा दौंडे यांनी पत्रकार परिषदेत दिली.
या वेळी बीसीए कॉलेजच्या प्राचार्या व संस्थेच्या आजन्म सेविका डॉ. समीक्षा निकम व शाळा समितीच्या सदस्या मधुरा काळे उपस्थित होत्या. दत्ताजी थोरात, प्राचार्या सुरेखा दौंडे यांनी सांगितले की, शंभर वर्षांपूर्वी भारतरत्न महर्षी धोंडो केशव कर्वे यांच्या प्रयत्नाने येथील दादासाहेब करंदीकर यांच्या वाड्यात कन्याशाळा सुरू झाली. १ नोव्हेंबर १९२२ रोजी या शाळेत सात विद्यार्थिनींनी प्रवेश घेतला होता. त्यानंतर स्व. रावबहादूर रावजी रामचंद्र काळे यांच्या वाड्यात शाळा स्थलांतरित झाली. काळे यांनी राहता वाडा पत्नी सौ. सत्यभामाबाई काळे यांच्या निधनानंतर कन्याशाळेस भेट म्हणून दिला. १९२२ मध्ये सुरू झालेल्या या शाळेस शंभर वर्षे पूर्ण होत आहेत. यानिमित्त वर्षभर कार्यक्रमांचे आयोजन केले होते. या सांगता समारोहाच्या कार्यक्रमात सर्व सातारकरांनी उपस्थित राहण्याचे आवाहनही यावेळी त्यांनी केले.
