मानवेल शेळके, नाशिक जिल्हा प्रतिनिधी
महाराष्ट्र संदेश न्युज ! ऑनलाईन नाशिक रोड:- येथील श्रीरामपूर येथून एक चोरीची खळबळजनक घटना समोर आली आहे. चोरट्यांनी कारची काच फोडून सुमारे साडेसहा लाखांची रोकड चोरून पसार झाले होते. पण एका चुकी मुळे चोरटे उपनगर पोलिसांच्या जाळ्यात अडकले असून, विना नंबरप्लेटच्या दुचाकीमुळे हे तिघे गस्ती पोलिसांच्या जाळ्यात अडकले आहे. त्यांना पोलिसांनी बेड्या ठोकल्या आहे.
उपनगर गुन्हे शोध पथकाचे अधिकारी गेल्या मंगळवारी पेट्रोलिंग करत असताना मुक्तिधाम परिसरात नंबर नसलेल्या काळ्या रंगाच्या पल्सरवरून तिघेजण संशयितरीत्या फिरताना आढळले. पोलिसांनी त्यांना थांबण्याचा इशारा केला असता ते पळून जाऊ लागले होते. पोलिसांनी त्यांचा दूरपर्यंत पाठलाग करून ताब्यात घेतले. त्यांची विचारपूस केली असता ते उडवाउडवीची उत्तरे देत होते. त्यामुळे पोलिसांचा संशय अधिकच बळावला. त्यानंतर या तिघांनाही पोलिस ठाण्यात आणून त्यांना पोलीसी खाक्या दाखवताच ते पोपटासारखे बोलू लागले. श्रीरामपूर येथील प्रभात डेअरीजवळील नीतू ढाबा येथे एका चारचाकीची मागील काच फोडून सहा लाख ४२ हजार रुपये लांबविल्याची कबुली त्यांनी दिली .या घटनेप्रकरणी श्रीरामपूर पोलिस ठाण्यात त्यांच्या विरोधात गुन्हाही दाखल आहे. लखन पवार रा. देवी मंदिराजवळ, निफाड, श्रीनिवास बोरजे रा.पिंपळगाव जलाल, ता. येवला, गौरव पवार रा. कुंदेवाडी, ता. निफाड अशी तिघा संशयितांची नावे आहेत. उपनिरीक्षक विकास लोंढे, हवालदार संजय ताजने, विनोद लखन, सूरज गवळी, पंकज करपे, राहुल जगताप, संदेश रघतवान यांच्या पथकाने हे तिघे जेरबंद केले आहेत.
