ईपीएफओ खातेधारक ई-नॉमिनेशनद्वारे त्यांच्या खात्यात नामनिर्देशित व्यक्तीचे नाव सहजपणे नोंदवू शकतात.
✒️राज शिर्के, मुंबई (पवई) प्रतिनिधी
महाराष्ट्र संदेश न्युज ! ऑनलाईन मुंबई, 17 जानेवारी : सेवानिवृत्तीनंतर जीवन सुखमय व्हावं, वृद्धापकाळात आर्थिक समस्या जाणवू नयेत यासाठी नोकरदार वर्ग आर्थिक नियोजन करत असतो. यात बचत आणि गुंतवणुकीच्या योजनांच्या माध्यमातून आर्थिक तजवीज केली जाते. सध्याच्या काळात अनेक बँका आणि वित्तीय संस्थांच्या बचत योजना ग्राहकांना आकर्षित करताना दिसतात; पण सरकारची कर्मचारी भविष्य निर्वाह निधी संघटना अर्थात ईपीएफओमुळे देशभरातला नोकरदार वर्ग आणि त्यांच्या कुटुंबीयांना फायदा होतो. आता प्रत्येक बाब डिजिटल होत आहे. त्यामुळे ईपीएफओने देखील खाते धारकांसाठी अनेक सुविधा ऑनलाइन देण्यास सुरुवात केली आहे ईपीएफओ खातेधारक ई-नॉमिनेशनच्या माध्यमातून आपल्या खात्याचा वारसदार अर्थात नॉमिनीचं नाव नोंदवू शकतो. नॉमिनी नोंदवण्याचे नेमके काय फायदे असतात, ते जाणून घेऊ या.
सरकारची ईपीएफओ सिस्टीम नोकरदार वर्गासाठी लाभदायक ठरत आहे. ईपीएफओ खातेधारकांना केवळ पेन्शनची सुविधा मिळत नाही, तर त्यांच्या खात्यात जमा होणाऱ्या रकमेवर बँकांच्या तुलनेत जास्त व्याज मिळतं. ईपीएफओ खातेधारकांना सध्या 8.1 टक्के व्याजदर मिळत आहे. कोणत्याही बँकेच्या एफडीवर मिळणाऱ्या व्याजाच्या तुलनेत हा दर सर्वाधिक आहे. आता ईपीएफओने खातेधारकांसाठी ऑनलाइन सुविधा देण्यास सुरुवात केली आहे. पूर्वी किरकोळ कामांसाठी खातेधारकांना ईपीएफओच्या कार्यालयात चकरा माराव्या लागत होत्या; पण ऑनलाइन सिस्टीममुळे खातेधारक घरबसल्या ईपीएफओशी संबंधित कामं करू शकतो. आता ईपीएफओ खातेधारक ई-नॉमिनेशनच्या माध्यमातून आपल्या खात्यावर नॉमिनीचं नाव नोंदवू शकतो. ईपीएफ खात्यावर नॉमिनीचं नाव असणं गरजेचं आहे. एखाद्या ईपीएफओ खातेधारकाचा अकाली मृत्यू झाला तर अशा प्रकरणात ऑनलाइन क्लेम सेटलमेंट सहज करता येते.
