नितीन शिंदे, ठाणे जिल्हा प्रतिनिधी
महाराष्ट्र संदेश न्युज ! ऑनलाईन ठाणे:- शहरातील चंदनवाडी विभागात नव्याने तयार झालेल्या श्री.जगन्नाथ (एसआरए) गृहनिर्माण संस्थेतील झोपडपट्टी लाभार्थ्यांना आज ४०० सदनिकांच्या चाव्यांचे वाटप राज्याचे मुख्यमंत्री एकनाथ शिंदे यांच्या हस्ते करण्यात आले.
यावेळी मुख्यमंत्री एकनाथ शिंदे म्हणाले की, आपले स्वतःचे हक्काचे घर असावे असे प्रत्येकाचे स्वप्न असते, ते चांगल्या दर्जाचे असावे, असे प्रत्येकाचे स्वप्न असते आज आपले हे स्वप्न पूर्ण होत असल्याचे समाधान वाटत असल्याचे मत व्यक्त केले. ४०० घरे आणि १०० गाळे असा हा प्रकल्प असून तो पूर्ण झाल्याचे समाधान आहे. एमएमआरमध्ये एसआरएचे स्वतंत्र कार्यालय केल्यामुळे आता गरजूंना लवकरात लवकर घरे मिळणे शक्य होईल. येथील रहिवाशांना व्यायामशाळा, बालवाडी, ग्रंथालय या सुविधा देण्यात आल्या असून या सुविधांची निगा राखणे त्या स्वच्छ ठेवणे ही आपली जबाबदारी असल्याचे यावेळी बोलताना मुख्यमंत्री एकनाथ शिंदे यांनी सांगितले.
ठाण्यात सुरू करण्यात आलेल्या क्लस्टर योजनेच्या माध्यमातून १० हजार नागरिकांना घरे देण्यात येणार असून त्यांच्या पहिल्या टप्प्याचे काम लवकरच सुरू करण्यात येणार आहे. याप्रसंगी आमदार प्रताप सरनाईक, मा.आमदार रवींद्र फाटक, आमदार निरंजन डावखरे, शिवसेनेचे महाराष्ट्र राज्य समन्वयक आणि प्रवक्ते नरेश म्हस्के, मुंबई महानगर प्रदेश झोपडपट्टी पुनर्वसन प्राधिकरण ठाणेचे मुख्य कार्यकारी अधिकारी पराग सोमण व इतर वरिष्ठ अधिकारी उपस्थित होते.
