राज शिर्के मुंबई महानगर प्रतिनिधी
महाराष्ट्र संदेश न्युज ! ऑनलाईन मुंबई:- पनवेल येथून एक खळबळजनक घटना समोर आली आहे. शहरातील मुख्य चौकात असलेल्या भारतीय संसद भवनाच्या प्रतिकृतीवर चढून भारतरत्न डॉ. बाबासाहेब आंबेडकर यांच्या पुतळ्याचे नुकसान करून विटंबना करण्याचा प्रयत्न करण्यात आल्याने खळबळ माजली. ही घटना सोमवारी दिनांक 23 रोजी घडली आहे. त्यात पोलिसांनी एका व्यक्तीला बेड्या ठोकल्या आहे.
सोमवारी सकाळच्या सुमारास एका व्यक्तीने भारतीय संसद भवनाच्या प्रतिकृतीवर चढून भारतरत्न डॉ. बाबासाहेब आंबेडकर यांच्या पुतळ्याचे नुकसान करून विटंबना करण्याचा प्रयत्न केला. पण पोलिसांनी वेळीच या व्यक्तीला ताब्यात घेतल्याने पुढील अनर्थ टळला. पनवेल शहर पोलिसांनी त्याला ॲट्रॉसिटी कायद्यानुसार अटक केली आहे. अटक करण्यात आलेला आरोपी शैलू ऊर्फ गोला पंडित अशोक शुक्ला वय 38 वर्ष हा करंजाडे भागात राहण्यास असून, तो भंगार विकण्याचे काम करतो.
मिळालेल्या माहितीनुसार सोमवारी सकाळी 10.45 वाजताच्या दरम्यान आरोपी शैलू पनवेल मधील मुख्य चौकातील डॉ. बाबासाहेब आंबेडकर यांचा पुतळा असलेल्या परिसरात घुसला होता. त्यानंतर त्याने तेथील भारतीय संसद भवनाच्या प्रतिकृतीवर चढून डॉ. बाबासाहेबांच्या पुतळ्याला धरून आरडाओरड करण्यास सुरुवात केली होती. या प्रकारामुळे त्या ठिकाणी बघ्यांची गर्दी झाली. शैलू डॉ. बाबासाहेब आंबेडकर यांच्या पुतळ्यास नुकसान पोहोचविण्याचा प्रयत्न करीत असल्याने त्या ठिकाणी आलेल्या वाहतूक पोलिसांनी नागरिकांच्या मदतीने त्याला खाली खेचले. त्यानंतर त्याला ताब्यात घेऊन पनवेल शहर पोलिस ठाण्यात नेले. पोलिसांनी त्याच्या विरोधात ॲट्रॉसिटी कायद्यानुसार गुन्हा दाखल करून त्याला अटक केली आहे.
