मुकेश चौधरी कार्यकारी संपादक
महाराष्ट्र संदेश न्युज ! ऑनलाईन हिंगणघाट:- भारतीय जैन संघटना, हिंगणघाट यांनी रविवार, २७ जुलै २०२५ रोजी जैन मंदिराच्या उपाश्रयामध्ये ‘गुणगौरव समारंभा’चे आयोजन करण्यात आले होते. यात धार्मिक आणि शिक्षण परीक्षांमध्ये उत्कृष्ट कामगिरी करणाऱ्या जैन समाजातील गुणवंत विद्यार्थी आणि महिलांना सन्मानित करणे हा या समारंभाचा मुख्य उद्देश होता.
या कार्यक्रमाला प्रमुख अतिथी म्हणून जैन श्वेतांबर पार्श्वनाथ मंदिर ट्रस्टचे अध्यक्ष सुधीर कोठारी, वर्धमान स्थानकवासी जैन श्रावक संघाचे अध्यक्ष भागचंद ओस्तवाल, दिगंबर जैन मंदिर ट्रस्टचे कोषाध्यक्ष मिलिंद जैन, आणि माजी नगराध्यक्ष राजेंद्र डागा उपस्थित होते. या सर्व पाहुण्यांनी आपल्या आशीर्वचनांनी विद्यार्थ्यांचे मनोबल वाढवले आणि त्यांना भविष्यातही उत्कृष्ट यश मिळवण्यासाठी प्रोत्साहित केले. आपल्या अध्यक्षीय भाषणात, ॲड. सुधीर कोठारी यांनी विद्यार्थ्यांना उच्च पदांवर पोहोचल्यानंतरही आपल्या पालकांचे अमूल्य योगदान विसरू नका असे आवाहन केले. पालकांचा सन्मान आणि सेवा आयुष्यभर सर्वोपरी राहिली पाहिजे यावर त्यांनी विशेष भर दिला.
या प्रसंगी, शैक्षणिक सत्र २०२४-२५ मध्ये आठवी, नववी, दहावी आणि बारावीच्या परीक्षांमध्ये ८५% पेक्षा जास्त गुण मिळवणाऱ्या विद्यार्थ्यांचा सन्मान करण्यात आला. याव्यतिरिक्त सीए, एमबीए, डॉक्टर, इंजिनियर, आर्किटेक्ट आणि पब्लिक सर्विसेस इत्यादी विभिन्न प्रोफेशनल डिग्री कोर्स मध्ये उत्तीर्ण झालेल्या सर्व विद्यार्थ्यांनाही सन्मानचिन्ह देऊन गौरवण्यात आले. समारंभात जैन धार्मिक परीक्षेत गुणवत्ता प्राप्त केलेल्या महिलांचाही सत्कार करण्यात आला. या विशेष प्रसंगी कवी डॉ. शांतिलाल कोचर यांना काशी हिंदी विद्यापीठाकडून ‘विद्या-वाचस्पती’ (मानद डॉक्टरेट) पदवी मिळाल्याबद्दल, पाहुण्यांच्या हस्ते सन्मानचिन्ह देऊन सत्कार करण्यात आला.
या कार्यक्रमाचे सूत्रसंचालन सौ. रिषिका बैद यांनी केले, तर डॉ. लोकेश ललवानी यांनी आभार मानले.या कार्यक्रमाला यशस्वी करण्यासाठी भारतीय जैन संघटनेचे अध्यक्ष अनुप कोठारी, उपाध्यक्ष अमोल बिडकर, महेंद्र कासवा, सचिव डॉ. लोकेश ललवाणी, सहसचिव सुशील वाकेकर, कोषाध्यक्ष हेमंत चोरडिया आणि सांस्कृतिक कार्यक्रम प्रमुख कुणाल मुथा आदींनी सक्रिय सहकार्य केले. या प्रसंगी समाजातील सर्व श्रावक-श्राविका मोठ्या संख्येने उपस्थित राहून विद्यार्थ्यांचा उत्साह वाढवला. ही माहिती राजेश कोचर यांनी दिली.
