मुंबई महानगर प्रतिनिधी
महाराष्ट्र संदेश न्युज ! ऑनलाईन मुंबई:- क्रीडा क्षेत्रातून एक खळबळजनक घटना समोर आली आहे. क्रिकेट प्रशिक्षण देत असताना गुरु-शिष्याच्या पवित्र नात्याला काळिमा फासणारी एक संतापजनक घटना कल्याण जवळ असलेल्या टिटवाळा परिसरातून समोर आली आहे. टिटवाळा पोलिसांनी दोन अल्पवयीन मुलींचा विनयभंग केल्याप्रकरणी क्रिकेटचे प्रशिक्षण देणाऱ्या एका 59 वर्षीय कोचला अटक केली आहे.
प्राप्त माहितीनुसार, आरोपी क्रिकेट कोचने गेल्या वर्षी दिवाळीच्या सुट्ट्यांमध्ये एका मुलीला अयोग्य पद्धतीने स्पर्श करून तिचा विनयभंग केला होता. हे सत्र यानंतर एवढ्यावरच थांबले नाही, तर अलीकडेच त्याने दुसऱ्या एका मुलीशीही असेच गैरवर्तन करण्याचा प्रयत्न केला. या पीडित मुलींचे वय 13 वर्षांच्या दरम्यान आहे.
जेव्हा पीडित मुलीने क्रिकेट प्रशिक्षण देणाऱ्या कोचच्या गैरवर्तन प्रकाराची माहिती धाडसाने आपल्या आई वडिलांना दिली, तेव्हा या घटनेचे गांभीर्य समोर आले. त्यानंतर पिढीत मुलीच्या पालकांनी परिसरातील इतर लोकांशी चर्चा केली असता, आरोपीने शेजारी राहणाऱ्या दुसऱ्या एका अल्पवयीन मुलीसोबतही अशाच प्रकारचे चुकीचे कृत्य केल्याचे उघड झाले. आपल्या मुलांच्या सुरक्षेचा प्रश्न निर्माण झाल्याने दोन्ही मुलींच्या पालकांनी तातडीने पोलीस स्टेशन गाठत तक्रार दाखल केली.
पिढीत मुलीच्या पालकांच्या तक्रारीवरून टिटवाळा पोलिसांनी संबंधित 59 वर्षीय क्रिकेट कोच विरुद्ध विनयभंग आणि पोक्सो कायद्यांतर्गत गुन्हा दाखल केला आहे. पोलिसांनी तातडीने हालचाली करत आरोपीला अटक केली आहेत. या घटनेमुळे परिसरात तीव्र संताप व्यक्त केला जात असून, पालकांमध्ये भीतीचे वातावरण आहे. मुलांच्या प्रशिक्षणासाठी पाठवताना प्रशिक्षकाची पार्श्वभूमी तपासणे किती आवश्यक आहे, असा प्रश्न या निमित्ताने पुन्हा एकदा ऐरणीवर आला आहे. टिटवाळा पोलीस या प्रकरणाचा अधिक तपास करत आहेत.