नितीन शिंदे, मुंबई महानगर प्रतीनिधी
महाराष्ट्र संदेश न्युज ! ऑनलाईन मुंबई:- 19 फेब्रुवारी छत्रपती शिवाजी महाराज यांच्या जयंतीच्या निमित्ताने आज शिवजन्मभूमी शिवनेरी किल्ल्यावर उपस्थित शासकीय इतमामात शिवजयंती साजरी करण्यात आली. यावेळी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी छत्रपती शिवाजी महाराज यांच्या जन्मस्थळी नतमस्तक होत त्यांना विनम्रपणे अभिवादन केले.
यावेळी शिवजन्मस्थानी पारंपरिक वेशातील महिलांनी शिवरायांची महती सांगणारा पाळणा गायिला. त्यानंतर राष्ट्रगीत तसेच ‘गर्जा महाराष्ट्र माझा’ या राज्यगीताची धून पोलीस बँड पथकाने वाजवून सलामी दिली. त्यानंतर पोलीस पथकाने बंदुकीच्या तीन फैरी झाडून छत्रपती शिवरायांना मानवंदना दिली.
राज्याच्या पर्यटन विभागाने हिंदवी स्वराज्य महोत्सव साजरा करीत असू त्यामुळे सर्व परिसर भगवामय झालेला आहे. महाराजांचा हा मावळा राज्याचा मुख्यमंत्री झाला आहे. गडकोट, किल्ले हा आपला इतिहास आहे, ती राज्याची संपत्ती आहे. त्यामुळे गडकिल्ल्यांच्या विकासासाठी निधी कमी पडू देणार नाही. अशी ग्वाही यासमयी बोलताना मुख्यमंत्री एकनाथ शिंदे यांनी दिली.
राज्यातील किल्ल्यांचा विकास आराखडा वेळेत पूर्ण केला जाईल. वढू, तुळापूरचा विकास केला जाईल. शिवप्रभुंचे दर्शन घ्यायला कोणालाही अडचण नसेल. गडकोट किल्ले ही आपली संपत्ती असून ती जपण्याचे काम योग्य प्रकारे करू अशी साद मुख्यमंत्री एकनाथ शिंदे यांनी तमाम शिवप्रेमींना घातली.
याप्रसंगी राज्याचे उपमुख्यमंत्री देवेंद्र फडणवीस, पर्यटन मंत्री मंगलप्रभात लोढा, आमदार प्रवीण दरेकर, आमदार अतुल बेनके, माजी खासदार शिवाजीराव अढळराव पाटील, माजी आमदार शरद सोनावणे आणि हजारो शिवप्रेमी मोठ्या संख्येने या सोहळ्यासाठी उपस्थित होते.
