रत्नु कांबळे, सिंधुदुर्ग जिल्हा प्रतिनिधी
कणकवली:- सिंधुदुर्ग जिल्ह्यातील वागदे येथून एक भीषण अपघात झाल्याची घटना समोर आली आहे. एका कंटेनरची समोरुन येणाऱ्या कारला धडक दिली, धडक इतकी भीषण होती की कार पूर्ण चकनाचुर झाली त्यात चालकाचा जागीच मृत्यू झाला.
कणकवली महामार्गावरून गोव्याच्या दिशेने मालवाहतूक करणार्या कंटेनरची समोरून येणाऱ्या कारला वागदे येथे जोरदार धडक दिली. या अपघातात कार चालक जागीच ठार झाला. प्रशांत प्रभाकर सावंत वय 47 वर्ष, राहणार नरडवे, सध्या रा. कणकवली असे मृत कार चालकाचे नाव आहे.
कणकवली येथील गडनदी पुलानजीकच्या वळणावर आज, शुक्रवारी दुपारच्या सुमारास हा अपघात झाला. अपघाताची माहिती मिळताच गावातील नागरिकांनी घटनास्थळी धाव घेतली. गडनदी पुलापुढे वागदे गावाच्या हद्दीत महामार्गाची एक लेन बंदावस्थेत आहे. येणारी – जाणारी वाहने एकाच लेनवर येत असल्याचे सातत्याने अपघात घडत असतात. या अपघातालाही महामार्ग प्राधिकरणचा निष्काळजीपणा कारणीभूत आहे, असा आरोप गावातील नागरिकांनी केला. जोपर्यंत ही बंद लेन सुरू केली जात नाही तोपर्यंत मृतदेह उचलायला देणार नाही, असा पावित्रा गावकऱ्यांनी घेतला होता.
या भीषण अपघाताची माहिती प्राप्त होताच पोलिस घटनास्थळी दाखल झाले. पंचनामा करून मृतदेह शविच्छेदनासाठी पाठवण्यात आला असून पुढील कारवाई पोलिस करत आहे.
