🖊️आशिष अंबादे, वर्धा जिल्हा प्रतिनिधी
वर्धा:- येथून एक दुर्दैवी बातमी समोर येत आहे. शहरातील रामनगर पोलीस ठाण्यात कार्यरत असलेले पोलीस अंमलदार रामहरी दिनकर शिरसाठ वय 33 वर्ष रा. तेलघाना ता. अंबेजोगाई जि. बीड यांना कर्तव्यावर असतानाच हृदयविकाराचा तीव्र झटका आल्याने त्यांचा 12 रोजी पहाटेच्या सुमारास मृत्यू झाला. या घटनेची वार्ता पसरताच पोलीस विभागात शोकाकुल वातावरण होते.
वर्धा येथील राम नगर पोलिस स्टेशन येथे पोलीस अंमलदार ब. नं. 847 रामहरी दिनकर शिरसाठ यांची 2010 मध्ये पाेलीस दलात नियुक्ती झाली. त्यांनी त्यांच्या कार्यकाळात विविध पोलीस ठाण्यांत कर्तव्य बजावले. सध्या ते रामनगर पोलीस ठाण्यात कार्यरत होते. ते डायल 112 या अत्याधुनिक वाहनातून गस्त घालीत असतानाच त्यांना 11 रोजी मध्यरात्री सुमारास अचानक अत्यवस्थ वाटू लागले. त्यामुळे ते आराम करण्यासाठी काही वेळासाठी घरी गेले. घरी आराम करीत असताना अचानक त्यांना हृदयविकाराचा तीव्र झटका आल्याने त्यांचा पहाटे 5 वाजताच्या सुमारास मृत्यू झाला.
त्यांच्या पश्चात पत्नी, 15 महिन्यांचा मुलगा आणि 6 वर्षांची मुलगी असे ते वर्ध्यातील घरी राहत होते. त्यांच्या मृत्यूची वार्ता माहिती होताच पोलीस दलात एकच खळबळ उडाली होती.
