पुणे जिल्हा प्रतिनिधी
महाराष्ट्र संदेश न्युज ! ऑनलाईन पुणे:- शहरातील फुरसुंगी परिसरातून एक खळबळजनक घटना समोर आली आहे. उन्हाळा तापत असताना परिसरात टँकरच्या माध्यमातून पाणी पुरवठा करण्यात येत असताना पाण्याच्या टँकरमध्ये महिलेचा मृतदेह आढळल्याने परिसरात एकच खळबळ माजली आहे. फुरसुंगी येथील पॉवर हाऊसजवळ पाणी सोडत असताना ही घटना समोर आली आहे. थेट पाण्याच्या टँकरमध्ये मृतदेह आढळून आल्याने हा खून आहे की आत्महत्या याबाबत पोलिसांकडून तपास केला जात आहे.
कौशल्या मुकेश चव्हाण असं या मृतक महिलेचं नाव असून कोंढवा पोलीस ठाण्यात महिला हरवल्याची तक्रार दाखल करण्यात आली होती. यानंतर टँकरमध्ये तिचा मृतदेह आढळल्यानंतर परिसरात वेगवेगळे संशय व्यक्त केले जात आहेत.
उन्हाळा तापत असताना परिसरात टँकरच्या माध्यमातून पाणी पुरवठा करण्यात येत आहे. त्यात पाण्याचा टँकर फुरसुंगी भागात पाणी सोडण्यासाठी पोहोचला होता. यावेळी टँकरमधून पाणी येत नसल्याने टँकरवर चढून पाहिलं असता टँकरमध्ये चक्क कौशल्या चव्हाण या महिलेचा मृतदेह तरंगत होता.
प्राप्त माहितीनुसार, मृतक कौशल्या मुकेश चव्हाण ही महिला घरातून बेपत्ता होती. याप्रकरणी नवऱ्याने पोलीस ठाण्यात येथे पत्नी बेपत्ता असल्याची तक्रार दाखल केली होती. महिला घऱातून निघून गेली होती असं नवऱ्याचं म्हणणं आहे. दरम्यान महिलेची हत्या झाली की आत्महत्या यासंबंधी पोलीस तपास करत आहेत. तसंच मृतदेह टँकरपर्यंत कसा पोहोचला याचा शोध पोलिसांना घ्यावा लागणार आहे. पोलिसांनी याप्रकरणी नवरा, नातेवाईकाला चौकशीसाठी ताब्यात घेतलं आहे.
