आत्महत्या केलेल्या तरुणाच्या कुटुंबीयांचा शिरवळ पोलिसांवर गंभीर आरोप.
आसमा सय्यद पुणे जिल्हा प्रतिनिधी
महाराष्ट्र संदेश न्युज ! ऑनलाईन पुणे:- जिल्हातून एक खळबळजनक माहिती समोर आली आहे. न्हावी येथील एका तरुणाने पोलिसांच्या मारहाणीमुळे आपल्या राहत्या घरी गळफास घेऊन आत्महत्या केल्याची घटना समोर आली आहे. अजय तुकाराम शिंदे वय 22 वर्ष, रा. न्हावी, तालुका भोर असे आत्महत्या केलेल्या तरुणाचे नाव आहे. याप्रकरणी कुटुंबीयांनी शिरवळ पोलिसांवर गंभीर आरोप केले आहेत.
मिळालेल्या माहितीनुसार, पूर्ववैमनस्यातून शिरवळ एमआयडीसी परिसरात बुधवारी रात्री 11.30 वाजता कंपनीच्या गेटजवळ अमर शांताराम कोंढाळकर वय 22 वर्ष, रा. वडवाडी, ता. खंडाळा याची तलवारीने घाव घालत हत्या करण्यात आली होती. याप्रकरणी तेजस महेंद्र निगडे वय 19 वर्ष, राह. गुणंद, तालू. भोर याला शिरवळ पोलिसांनी अटक केली होती. न्यायालयाने त्याला 5 दिवसांची पोलिस कोठडी सुनावली होती, त्यानंतर ती कोठडी तीन दिवसांसाठी वाढवण्यात आली. या घटनेचा तपास शिरवळ पोलीस स्टेशनचे पोलीस निरीक्षक संदीप जगताप करीत आहेत.
या हत्येच्या चौकशीदरम्यान, आरोपीसोबत कंपनीत काम करणाऱ्या इतर तरुणांची देखील पोलिसांकडून चौकशी केली जात होती. त्यात अजय तुकाराम शिंदे यालाही पोलिसांनी चौकशीसाठी सोमवारी दि.17 फेब्रुवारी रोजी बोलावले होते. अजय आपल्या कुटुंबासोबत शिरवळ पोलिस ठाण्यात हजर झाला.
यावेळी पोलिसांनी त्याला चौकशीसाठी ताब्यात घेत पोलिसी खाक्या दाखवत जबर मारहाण केली. मारहाणीनंतर त्याचे हात-पाय सुजले होते. संध्याकाळी 7.00 वाजता त्याला सोडण्यात आले आणि पुढील दिवशी पुन्हा चौकशीसाठी बोलवण्यात आले. दरम्यान मारहाणीच्या भीतीमुळे अजयने आपल्या राहत्या घरी गळफास लावून आत्महत्या केली. पोलिसांच्या दबावामुळेच अजयने आत्महत्या केल्याचा आरोप मृतक अजयच्या कुटुंबीयांनी केला आहे.
