विश्वनाथ जांभूळकर एटापल्ली तालुका प्रतिनिधी
महाराष्ट्र संदेश न्युज ! ऑनलाईन एटापल्ली:- शहरातील नगराध्यक्ष आणि नगरपंचायतीच्या ढिसाळ कारभाराचा आणखी एक बळी! मोकाट जनावरांमुळे होणारे अपघात नित्याचे झाले असतानाही, प्रशासनाच्या अक्षम्य दुर्लक्षामुळे २० जून २०२५ रोजी ला रात्री ११ वाजून ३४ मिनिटांनी राजीव गांधी चौकात एका भीषण अपघातात एका निष्पाप बैलाचा जागीच तडफडून मृत्यू झाला. या हृदयद्रावक घटनेने शहरातील नागरिकांमध्ये संतापाची लाट उसळली असून, नगराध्यक्ष आणि प्रशासनावर आता केवळ मनुष्यवधाचाच नव्हे तर ‘पशूवधाचा’ गुन्हा दाखल करण्याची मागणी जोर धरू लागली आहे.
शहराच्या मुख्य मार्गांवर आणि वर्दळीच्या ठिकाणी मोकाट जनावरे बिनधास्तपणे फिरतात आणि रस्त्यांवरच ठाण मांडून बसतात. यामुळे वाहन चालकांना जीवघेण्या धोक्यांचा सामना करावा लागतो, हे सर्वश्रुत आहे. स्थानिक नागरिक आणि वाहनचालकांनी अनेकवेळा नगरपंचायतीकडे या गंभीर समस्येबाबत तक्रारी केल्या आहेत, मात्र प्रशासनाच्या कानठळ्या बसलेल्या आहेत. यापूर्वीही या मोकाट जनावरांमुळे अनेक लहान-मोठे अपघात झाले आहेत. अनेक नागरिक जखमी झाले, काहींना कायमचे अपंगत्व आले, तर काही वाहनांचे मोठे नुकसान झाले. तरीही नगराध्यक्ष आणि नगरपंचायतीने या गंभीर समस्येकडे सोयीस्करपणे दुर्लक्ष केले, हे अत्यंत खेदजनक आहे.
काल रात्री घडलेली ही हृदयद्रावक घटना प्रशासनाच्या पूर्णतः निष्क्रियतेचे द्योतक आहे. एका निष्पाप बैलाचा नाहक बळी नगराध्यक्ष आणि नगरसेवकांच्या उदासिनतेमुळेच गेला आहे. प्रशासनाने मोकाट जनावरांच्या बंदोबस्तासाठी कोणतीही ठोस उपाययोजना केली नाही, ही त्यांची अक्षम्य आणि अक्षम्य चूक आहे. ही केवळ एक घटना नाही, तर प्रशासनाच्या गलथान कारभाराचा हा जिवंत पुरावा आहे, जो जनतेला रोजच्या जगण्यात त्रास देत आहे.
एटापल्ली शहरातील जनता आता जागी झाली आहे. नगराध्यक्ष आणि नगरपंचायतीने तात्काळ या मोकाट जनावरांचा कायमस्वरूपी बंदोबस्त करावा, त्यांच्यासाठी योग्य निवार्याची सोय करावी, अन्यथा जनतेच्या प्रखर रोषाला सामोरे जाण्यासाठी तयार रहावे. यापुढे असे अपघात झाल्यास त्याची संपूर्ण जबाबदारी नगराध्यक्ष आणि नगरपंचायतीची असेल, असा संतप्त इशारा नागरिकांनी दिला आहे.
