नासिर सुलेमान खान नवी मुंबई प्रतिनिधी
महाराष्ट्र संदेश न्युज ! ऑनलाईन नवी मुंबई:- येथील एरोली येथून एक खळबळजनक घटना समोर आली आहे. येते दहाव्या वर्गात शिक्षण घेत असलेल्या एका 16 वर्षीय विद्यार्थिनीने आत्महत्या केल्याने परिसरात एकच खळबळ माजली आहे. अनुष्का शहाजी केवळे वय 16 वर्ष असे आत्महत्या केलेल्या विद्यार्थिनीचे नाव आहे. विद्यार्थिनीने आत्महत्या केल्या प्रकरणी शाळेच्या मुख्याध्यापिका कविता देशमुख यांच्याविरोधात आत्महत्येस प्रवृत्त केल्याचा गुन्हा रबाळे पोलिस स्टेशन मध्ये नोंदविण्यात आला आहे.
काय आहे ही घटना: प्राप्त माहितीनुसार, आत्महत्या करणारी अनुष्का केवळे ही विद्यार्थिनी ऐरोली येथील सुषिलाबाई देशमुख विद्यालयात शिक्षण घेत होती. तिची सध्या परिक्षा सुरू होती. मृतक अनुष्का 3 ऑक्टोबर रोजी शाळेत परिक्षा देण्यासाठी गेली होती. त्यावेळी तिच्या बाकाखाली एक कॉपी मिळून आली. ती कॉपी अनुष्काने केल्याचा आरोप शिक्षकांनी केला होता. त्यानंतर मुख्याध्यापिका कविता देशमुख यांनी संपूर्ण वर्गासमोर अनुष्काला अपशब्द वापरून फटकारले होते. शिवाय झोपडपट्टीवाले असे संबोधून तिचा सार्वजनिकरित्या अपमान केला, असा गंभीर आरोप विद्यार्थिनीच्या पालकांनी केला आहे. या घटनेनंतर मानसिक तणावाखाली आलेल्या अनुष्काने त्याच दिवशी संध्याकाळी साडेसातच्या सुमारास घरी आपल्या खोलीत गळफास घेऊन आत्महत्या केली.
मुलीने आत्महत्या केल्याने केवळे कुटुंबावर दुःखाचा डोंगर कोसळला आहे. त्यांनी तात्काळ रबाळे पोलिस स्टेशन मध्ये याबाबत तक्रार दाखल केली आहे. तक्रारीच्या आधारे रबाळे पोलिसांनी सुषिलाबाई देशमुख विद्यालयात येथील मुख्याध्यापिका कविता देशमुख यांच्याविरोधात आत्महत्येस प्रवृत्त केल्याचा गुन्हा दाखल केला आहे. या प्रकरणाबाबत रबाळे पोलिसांनी सर्व घटना सांगितली आहे. विद्यार्थिनीच्या वडिलांनी दिलेल्या तक्रारीच्या आधारे आम्ही प्रकरण नोंदवले आहे. आरोपानुसार विद्यार्थिनीला वर्गात अपमानास्पद वागणूक देण्यात आली होती असं पोलीसांनी सांगितलं. ज्यामुळे तिने आत्महत्येचे टोकाचे पाऊल उचलले असं ही पोलीसांनी सांगितलं.
या घटनेनंतर ऐरोली परिसरात हळहळ व्यक्त करण्यात येत आहे. शिवाय शैक्षणिक संस्थांमधील विद्यार्थ्यांवरील मानसिक ताण आणि अपमानाच्या घटनांकडे गांभीर्याने पाहण्याची गरज असल्याची भावना समाजातून व्यक्त होत आहे. शिक्षकांनी विद्यार्थ्यांसोबत कसं वागलं पाहीजे याचीही चर्चा या निमित्ताने होत आहे.
