राज शिर्के मुंबई महानगर प्रतिनिधी
महाराष्ट्र संदेश न्युज ! ऑनलाईन मुंबई:- येथील घाटकोपर येथून एक खळबळजनक घटना समोर आली आहे. येथे भरदिवसा चोरट्यांनी एका सराफा दुकानात दरोडा टाकला आहे. त्यामुळे परिसरात खळबळ माजली आहे. ही घटना अमृतनगर सर्कल येथील दर्शन ज्वेलर्स येथून समोर आली आहे. या दरोडेखोरांना अडवण्याचा प्रयत्न केला असता दरोडेखोरांनी सराफा दुकानच्या मालकावर धारदार शस्त्राने हल्ला केला. तसेच दुकानाबाहेर दहशत माजवण्यासाठी गोळीबार देखील केला आहे. या घटनेने घाटकोपर परिसर हादरला आहे.
मिळालेल्या माहितीनुसार, तीन दरोडेखोर सकाळी 10.30 वाजताच्या सुमारास अमृतनगर परिसरातील दर्शन ज्वेलर्स मध्ये दरोद्याच्या उद्देशाने घुसले. त्यांनी दुकान लुटण्याचा प्रयत्न केला. काही दागिने लुटले, मात्र दुकानचे मालक दर्शन मिटकरी यांनी यांना विरोध केला. त्यामुळे दरोडेखोरांनी त्यांच्यावर धारदार शस्त्राने वार केले आणि बाहेर पळाले. तिघांपैकी दोन जण दुचाकी वर पळून गेले तर एक जण हातात बंदूक घेऊन पळत निघाला.
दहशत माजवण्यासाठी हवेत गोळीबार: तिसऱ्या दरोडेखोराने नागरिकांना भीती दाखविण्यासाठी आपल्या बंदुकीतून हवेत दोन गोळ्या झाडल्या आणि इंदिरा नगरच्या डोंगरावर पळून गेला. या घटनेची माहिती मिळताच पोलिस, फॉरेन्सिक टीम, गुन्हे शाखा, वरिष्ठ पोलीस अधिकारी घटनास्थळी दाखल झाले असून तपासाला सुरुवात करण्यात आली आहे. भरदिवसा अशा प्रकारचा दरोडा आणि गोळीबार होतो, त्यामुळे या भागात कायदा आणि सुव्यवस्थेचा प्रश्न निर्माण झाला आहे. या घटनेमुळे परिसरात आता भीतीचं वातावरण पसरलं आहे.
आरोपींचा शोध घेण्यासाठी 6 पथकं तयार: या घटनेत दर्शन मिटकरी हे जखमी झाले आहेत, त्यांच्यावर जवळच्या खासगी रुग्णालयात उपचार सुरू आहेत. पोलीसांनी या घटनेची गंभीर दखल घेत ताबडतोब गुन्हा दाखल केला आहे. पोलीसांनी या दरोडेखोरांचा शोध घेण्यासाठी सहा विशेष तपास पथकं तयार केली आहेत. सध्या पोलीस परिसरातील सीसीटीव्ही फूटेज तपासण्याचे काम करत आहेत. याबाबत बोलतान पोलीस अधिकारी म्हणाले की, ‘ही घटना अत्यंत गंभीर असून आरोपींना लवकरात लवकर अटक केली जाईल. आम्ही पुरावे गोळा करत आहोत. त्याच्या आधारे आरोपींचा शोध घेतला जाईल.
