विश्वास त्रिभुवन, अहमदनगर जिल्हा प्रतिनिधी
अहमदनगर : मुलीवर अत्याचार केल्याबद्दल आरोपी सतीश बन्सी उमाप वय ३५, वर्ष राह. राहुलनगर, ता. पारनेर याला २० वर्षे सक्तमजुरी व दोन हजार रूपये दंड, दंड न भरल्यास १ महिना साधी कैदेची शिक्षा विशेष जिल्हा व सत्र न्यायाधीश माधुरी मोरे यांनी ठोठावली आहे.
सदर खटल्याचे कामकाज विशेष सरकारी वकील ॲड. मनिषा केळगंद्रे – शिंदे यांनी पाहिले. पीडित मुलगी ता. १२ सप्टेंबर २०१८ रोजी एका धार्मिक उत्‍वासानिमित्त सतीश बन्सी उमाप याच्या घरी गेली होती. सतीश याने तिला चाकू दाखवून धमकावले व त्यानंतर आरोपी याने मुलीवर अत्याचार केला. या घटनेचे त्याच्या मोबाईलमध्ये व्हिडीओ शुटींग केले होते. सदरचे व्हिडीओ शुटींग पीडित मुलीला दाखवले व जर कोणाला काही सांगितले तर हे व्हिडीओ शुटींग व्हायरल करण्याची धमकी दिली होती. मुलगी गरोदर राहिली असल्याचे आईच्या लक्षात आले. आईने विश्‍वासात घेऊन माहिती विचारली. त्यानंतर मुलीने ता. १४ एप्रिल २०१ ९ रोजी पारनेर पोलिस ठाण्यात आरोपी सतीश बन्सी उमाप याच्या विरूध्द तक्रार दिली होती.
आरोपी विरूद्ध भा.दं.वि. आणि लैंगिक अपराध पासून बालकांचे संरक्षण कायदा तसेच माहिती तंत्रज्ञान कायद्यान्यवये गुन्हा दाखल करण्यात आला होता. पोलिस निरीक्षक बाजीराव पोवार यांनी तपास करून न्यायालयामध्ये आरोपीविरुध्द दोषारोपत्र दाखल केले. पीडित मुलीस गर्भवती होऊन बराच कालावधी झालेला होता. त्यामुळे गर्भपात करणे शक्य नव्हते. तिचे सिझेरीयन करून बाळंतपण करण्यात आले.
या खटल्यामध्ये सरकार पक्षातर्फे १६ साक्षीदार तपासण्यात आले. फिर्यादीची साक्ष, डी. एन. ए. पुरावा महत्वाचा ठरला. विशेष सरकारी वकील अॅड. मनिषा केळगंद्रे – शिंदे यांनी न्यायालयासमोर केलेला युक्तीवाद ग्राह्य धरण्यात आला व सतीश उमाप याला २० वर्षे सक्तमजुरी व दोन हजार रूपये दंड, दंड न भरल्यास १ महिना साधी कैदेची शिक्षा ठोठावली आहे. पारनेर पोलिस ठाण्याचे हवालदार शिवनाथ बडे यांनी सहकार्य केले.
आपल्या परिसरातील बातम्या व घडामोडी बघण्याकरीता आजच महाराष्ट्र संदेश न्यूजच्या वेबसाईट ला www.maharashtrasandesh.com ला भेट द्या. 9766445348/7385445348
