मानवेल शेळके, नाशिक जिल्हा प्रतिनिधी
नाशिक :- येथून एक खळबळजनक घटना समोर आली होती. अनैतिक संबंधातून वारंवार वाद होत असल्याने डॉक्टर पत्नीने पतीला भुलीचे इंजेक्शन दिल्याचा प्रकार २६ सप्टेंबर २०२२ ला घडला होता. त्यानंतर कोमात गेलेले पती डॉ. सतीश देशमुख वय ५९यांचा अखेर गुरुवारी दि.१३ उपचारादरम्यान मृत्यू झाला. या घटनेनंतर गुन्ह्यात संशयित असलेली पत्नी सुहासिनी धुमाळ व तिचा प्रियकर संशयित कांडेकर फरार झाला असून, पोलीस त्यांच्या मागावर आहेत.
म्हसरूळ परिसरात डॉ. सतीश देशमुख यांचे स्वत:चे हॉस्पिटल आहे. या रुग्णालयात पत्नी व तिचा प्रियकर १० सप्टेंबर २०२२ रोजी डॉ. देशमुख यांना भेटले. या ठिकाणी डॉ. देशमुख सोबत दोघांचे वाद झाले. त्यानंतर प्रियकर निघून गेला. तर डॉ. देशमुखांची पत्नी हॉस्पिटलमध्ये विश्रांती कक्षात गेली. तिने डॉ. देशमुख यांना भुलीचे इंजेक्शन देत ठार करण्याचा प्रयत्न केला. ही बाब डॉ. देशमुखांनी त्यांच्या मुलाला सांगितले. त्याने पोलिसांना माहिती दिली. पोलिसांनी त्याच्या फिर्यादीवरुन डॉक्टरांच्या पत्नीसह प्रियकराविरुद्ध गुन्हा दाखल केला. दुसर्‍या पत्नीचे नात्यातीलच एकाशी अनैतिक संबंध असल्याचे डॉ. देशमुखांना समजले. त्यातून हा वाद झाला.
तक्रारदार डॉ. देशमुखांच्या पहिल्या मुलगा आहे. डॉक्टरांचे दुसर्‍या पत्नीशी असलेल्या अनैतिक संबंधांमुळे त्यांच्या पहिल्या पत्नीने काही वर्षांपूर्वी आत्महत्या केली होती. पहिल्या पत्नीच्या आत्महत्या प्रकरणात डॉ. देशमुखांविरुद्ध गुन्हा दाखल झाला. त्यात डॉक्टरांना पाच ते सहा वर्षांचा कारावास झाला. डॉ. देशमुखांना दुसर्‍या पत्नीपासून एक अपत्य झाले. मात्र, डॉ. देशमुख कारागृहात गेल्याने तिने दुसर्‍याशी लग्न केले. तिचे ज्याच्यांशी विवाह झाला, त्यांचाही काही वर्षातच हृदयविकाराने मृत्यू झाला. दरम्यान, कोरोनापूर्वी डॉ. देशमुख कारागृहातून मुक्त झाले. ते पहिल्या पत्नीच्या मुलासह राहू लागले. दरम्यान, दुसर्‍या पत्नीला कोरोना झाला. तिने डॉ. देशमुखांकडे उपचार घेतले. त्यावेळी दोघे पुन्हा एकत्र आले. त्यांनी रजिस्टर लग्न केले होते.
भुलीचे इंजेक्शन दिल्यानंतर डॉ. सतीश देशमुख यांच्या नाशिक शहरातील खासगी हॉस्पिटलमध्ये उपचार सुरु होते. मात्र, ते कोमात गेले होते. त्यातच त्यांची प्रकृती खालावली होते. गुरुवारी दि.१३ त्यांचा उपचारादरम्यान मृत्यू झाला. याप्रकरणी म्हसरूळ पोलीस ठाण्यात नोंद करण्यात आली आहे. पुढील तपास म्हसरूळ पोलीस करत आहेत.
