विश्वास त्रिभुवन, अहमदनगर जिल्हा प्रतिनिधी
अहमदनगर:- येथून एक खळबळजनक घटना समोर आली आहे. एका लाचखोर अधिकाऱ्याला लाचलुचपत प्रतिबंधक विभागच्या पथकाने लाच स्वीकारताना रंगेहाथ पकडले. त्यामुळे सर्वत्र एकच खळबळ उडाली आहे. तक्रारदाराविरुद्ध दाखल असलेल्या गुन्ह्याची सुनावणी न्यायालयात सुरू होती. तक्रारदाराविरुद्ध आणखी एकही गुन्हा दाखल नाही, असा अहवाल देण्याकरिता महिला व बालकल्याण विकास कार्यालयातील अधिकार्‍याने तीन हजार रुपयांची लाच स्वीकारल्याच्या आरोपावरून अटक करण्यात आली. महेश अनंतराव पाटील वय 52, जिल्हा परिविक्षा अधिकारी, महिला व बालविकास अधिकारी कार्यालय, सर्जेपुरा, अहमदनगर असे आरोपीचे नाव आहे.
अधिक माहिती अशी की, तक्रारदार यांच्याविरुद्ध 2020 मध्ये एमआयडीसी पोलिस ठाण्यात मारामारीचा गुन्हा दाखल होता. या गुन्ह्याची सुनावणी न्यायालयात सुरू होती. न्यायालयाने तक्रारदार यांच्याविरुद्ध आणखी काही गुन्हे दाखल आहेत काय याची चौकशी करून अहवाल सादर करण्याचे निर्देश जिल्हा परिविक्षा अधिकारी यांना दिले होते. त्याअनुषंगाने तक्रारदार यांच्याविरुद्ध आणखी इतर गुन्हे दाखल नसल्याबाबतचा अहवाल न्यायालयात पाठविण्यासाठी आरोपी महेश पाटील याने तीन हजारांची लाच मागितली. त्यानंतर तक्रारदार यांनी लाचलुचपत प्रतिबंधक विभाग अहमदनगर यांच्याकडे तक्रार केली.
लाचलुचपत प्रतिबंधक विभाग पथकाने 27 ऑक्टोबर रोजी पडताळणी केली असता आरोपी पाटील याने तीन हजारांच्या लाचेची मागणी केल्याचे निष्पन्न झाले. त्यावरून 27 ऑक्टोबर 2022 रोजी नगर शहरातील सर्जेपुरा येथील कार्यालयात लाचेचा सापळा आयोजित केला असता आरोपी महेश पाटील याने तक्रारदाराकडून तीन हजारांची लाच स्वीकारली असता त्याला रंगेहाथ पकडले. याबाबत तोफखाना पोलिस ठाण्यात गुन्हा दाखल करण्यात आला. ही कारवाई पोलिस उपअधीक्षक हरिष खेडकर यांच्या मार्गदर्शनखाली पोलिस निरीक्षक शरद गोर्डे, पोलिस हवालदार संतोष शिंदे, पोलिस नाईक रमेश चौधरी, विजय गंगुल, रवींद्र निमसे, वैभव पांढरे, बाबासाहेब कराड, महिला पोलीस नाईक संध्या म्हस्के यांच्या पथकाने केली. दरम्यान, आरोपीला न्यायालयाने 31 ऑक्टोबरपर्यंत पोलिस कोठडी दिली आहे. पोलिस तपासात आणखी काही बड्या अधिकार्‍यांची नावे निष्पन्न होण्याची शक्यता आहे.
आपल्या परिसरातील बातम्या व घडामोडी बघण्याकरीता आजच महाराष्ट्र संदेश न्यूजच्या वेबसाईट www.maharashtrasandesh.com ला भेट द्या. 9766445348/7385445348
