मानवेल शेळके, नाशिक जिल्हा प्रतिनिधी
नाशिक:- नाशिक जिल्ह्यातील पंचवटी पोलिस स्टेशनच्या हद्दीत येणाऱ्या मेरी शासकीय वसाहतीत एका व्यक्तीची हत्या करण्यात आल्याने एकच खळबळ माजली आहे. सरकारी विभागात कर्मचारी असणाऱ्या संजय वायकंडे या इसमाची गळा आवळून हत्या करण्यात आली. विशेष म्हणजे ही बाब ज्या प्रकारे उघडकीस आली, त्याने घटनेचं गूढ अधिक वाढलंय. या हत्या प्रकरणाची नोंद पंचवटी पोलिसांनी करुन घेतली आहे. आता पुढील तपास केला जात आहे.
काय आहे घटना?
संजय वायकंडे यांचं शव राहत्या घरात आढळून आलं. धक्कादायक बाब म्हणजे त्यांची पत्नी माहेरी गेली होती. ती गावावरुन जेव्हा सासरी परतली, तेव्हा पतीची अवस्था पाहून ती हादरुनच गेली. या घटनेनंतर परिसरात एकच खळबळ माजली आहे.
संजय वायकंडे हे जलसंपदा विभागात क्लर्क म्हणून कार्यरत होते. घरात बेशुद्ध अवस्थेत असलेल्या संजय वायकंडे यांच्याबाबत पोलिसांनाही कळवण्यात आलं. पोलिसांच्या तपासातून संजय वायकंडे हे मृतावस्थेत असल्याचं समोर आलं. त्यानंतर त्यांचा मृतदेह हा पोस्ट मॉर्टेमसाठी पाठवण्यात आला. विशेष म्हणजे पोस्ट मॉर्टेम रिपोर्टमधून धक्कादायक खुलासा झाला आहे.
शववि्छेदन अहवालामध्ये संजय वायकंडे यांची गळा आवळून हत्या करण्यात आली असल्याची माहिती समोर आली आहे. त्यामुळे या घटनेचं गूढ अधिक वाढलंय. संजय वायकंडे यांच्या हत्येला जबाबदार कोण, असा प्रश्न आता उपस्थित केला जातो आहे.
मृत वायकंडे यांची बायको घरी आल्यानंतर हे प्रकरण उघडकीस आल्यामुळे या हत्येचा घटनाक्रम आणि हत्या कुणी केली? का केली? याचा छडा लावण्याचं आव्हान पोलिसांसमोर असणार आहे.
