मानवेल शेळके, नाशिक जिल्हा प्रतिनिधी
नाशिक:- शहरात घरमध्ये घुसून चोरी करणाऱ्या चोरट्यास न्यायालयाने दोन वर्षे तीन महिने सश्रम कारावास व दोन हजार रुपयांचा दंड अशी शिक्षा सुनावली आहे. अजय वाघेला असे घरफोडी करणाऱ्या चोरट्याचे नाव आहे.
देवळाली कॅम्प येथील लॅम रोड परिसरात २६ ते २७ मार्च २०२० या कालावधीत विष्णू संतू खताळे यांच्या घरात चोरट्याने घरफोडी करून ११ हजार रुपयांचा ऐवज लंपास केला होता. या प्रकरणी देवळाली कॅम्प पोलिस ठाण्यात चोरट्याविरोधात घरफोडीचा गुन्हा दाखल करण्यात आला होता. तपास अधिकारी सहायक पोलिस उपनिरीक्षक बी. पी. हांडोरे यांनी तपास करून अजय वाघेला याच्यासह आणखी एकास अटक करून त्याच्याकडून घरफोडीतील मुद्देमाल जप्त केला होता.या गुन्ह्याचा तपास करून न्यायालयात दोषारोपपत्र दाखल करण्यात आले. सरकारी पक्षातर्फे पी. एस. सपकाळे यांनी युक्तिवाद केला.
या प्रकरणात साक्षीदारांच्या साक्ष, परिस्थितीजन्य पुराव्यांच्या आधारे अजय याने घरफोडी केल्याचे निष्पन्न झाले असून. त्यामुळे प्रथमवर्ग न्याय दंडाधिकारी एस. एस. देशमुख यांनी वाघेला यास घरफोडी केल्याप्रकरणी सश्रम कारावास व दंड ठोठावला आहे. या खटल्यात पैरवी अधिकारी म्हणून पोलिस अंमलदार किरण बाबूराव गावंडे यांनी कामकाज पाहिले.
