नगर: महिलांच्या दागिन्यांची चोरी करणार्‍या सराईत दोन गुन्हेगारांना स्थानिक गुन्हे शाखेच्या पथकाने ठोकल्या बेड्या.

स्थानिक गुन्हे शाखेचे पोलिस निरीक्षक अनिल कटके यांना माहिती मिळाली होती की, आरोपी कंबर मिर्झा हा चोरलेले सोन्याचे दागिने श्रीरामपूर-पुणतांबा रोडवरील हॉटेल मिरावली येथे विक्री करण्यासाठी येणार आहे. त्यानुसार, स्थानिक गुन्हे शाखेच्या पथकाने हॉटेल मिरावली येथे सापळा लावून आरोपी कंबर रहिम मिर्झा याला अटक केली. त्याची अंगझडती घेतली असता कापडी पिशवीत सोन्याचे दागिने मिळून आले. चार गुन्ह्यांत चोरीला गेलेले दोन लाख 75 हजार किमतीचे 55 ग्रॅम वजनाचे दागिने कंबर रहिम मिर्झा याच्याकडून हस्तगत करण्यात आले आहेत. तसेच, आरोपी आयुब फैयाज इराणी याला पोलिसांनी त्याच्या घरून ताब्यात घेतले आहे. या प्रकरणी पुढील तपास लोणी पोलिस करत आहेत. ही कारवाई पोलिस निरीक्षक अनिल कटके यांच्या मागर्दशनाखाली सहायक फौजदार भाऊसाहेब काळे, हेड कॉन्स्टेबल विजयकुमार वेठेकर, बबन मखरे, देवेंद्र शेलार, शंकर चौधरी, ज्ञानेश्वर शिंदे, संदीप दरदंले, रवि सोनटक्के, दीपक शिंदे, आकाश काळे, मेघराज कोल्हे, उमाकांत गावडे, भरत बुधवंत यांनी केली. साथीदाराच्या मदतीने चोरी आरोपी कंबर रहिम मिर्झा व त्याचा साथीदार आयुब इराणी या दोघांनी अहमदनगर, राहुरी, लोणी व संगमनेर येथे महिलांच्या गळ्यातील दागिने चोरल्याची कबूली दिली आहे.

दोघांवर 52 गुन्हे दाखल..
आरोपी कंबर रहिम मिर्झा याच्यावर 35 तर आयुब फैयाज इराणी याच्यावर 17 असे गुन्हे दाखल आहेत. यामध्ये दरोडा तयारी, जबरी चोरी, चोरी व फसवणूक अशा या गंभीर स्वरुपाच्या गुन्ह्यांचा समावेश आहे