✒️वैशाली गायकवाड उपसंपादक (पुणे)
पुणे:- आज सर्वच ठिकाणी भेसळ सुरू आहे. त्यात आता मुक्या जनावरांना देखील सोडलं नाही. अशीच एक खळबळजनक घटना समोर आली आहे. गाई, म्हशी आणि इतर दूध देणाऱ्या जनावरांचे दूध वाढवण्यासाठी बेकायदेशीरपणे दिल्या जाणाऱ्या औषधाच्या कारखान्यावर छापा टाकण्यात आला आहे. पुणे पोलिसांनी हा कारखाना उघडकीस आणला असून 52 लाख रुपयाची अवैध औषधी जप्त करण्यात आली आहे. पुणे पोलिसांच्या अंमली पदार्थ विरोधी पथक आणि औषध विभागाकडून ही कारवाई करण्यात आली आहे. या प्रकरणी पुणे पोलिसांनी पाच आरोपींना अटक केली आहे.
समीर अन्वर कुरेशी वय 29, रा. कलवड वस्ती, लोहगाव, बिश्वजीत सुधांशु जाना वय 44, रा. पुरबा बार, विलासपुर, पुरबा मदीनीनपुर, पश्चिम बंगाल, मंगल कनललाल गिरी वय 27, तिराईपूर, पश्चिम बंगाल, सत्यजीत महेशचंद्र मोन्डल वय 22, रा. नबासन कुस्तीया पंचायत, पश्चिम बंगाल आणि श्रीमंता मनोरंजन हल्दर वय 32, रा. नलपुरकुर, मंडाल, पश्चिम बंगाल अशी अटक केलेल्या आरोपीची नावे आहेत.
पुण्यातील लोहगाव परिसरातील कलवड वस्तीत गाई, म्हशीच्या दुध वाढवण्यासाठी ऑक्सिटॉसिन या औषधाचा वापर मोठ्या प्रमाणत सुरु होता. या औषधाचा बेकायदा साठा असल्याची माहिती अंमली पदार्थ विरोधी पथकास मिळाली होती. या पथकाने “एफडीए’च्या अधिकाऱ्यांना याबाबतची माहिती दिली होती. पत्र्याच्या शेडमध्ये काही पुठ्यांच्या खोक्यात हा औषधांचा साठा केला आहे, अशी माहिती उघडकीस आली होती. या सगळ्याची माहिती मिळताच शनिवारी लोहगावमधील कलवड वस्ती तेथे छापा टाकला, अशी माहिती पोलिसांनी दिली आहे.
पाचही जणांची टोळी पश्चिम बंगाल, उत्तर प्रदेश मधून आलेली होती. काही दिवसांपासून ही टोळी पुण्यात वास्तव्यास होती. या टोळीने औषध विक्रेता असल्याचे सांगत अनेकांना औषध विकले होते. फसवणूक, प्राण्यांना अमानुष वागणूक देणे, अशा विविध कलामानुसार त्यांच्यावर गुन्हा दाखल करण्यात आला आहे. टोळीने नेमकं कोणा कोणाला औषध विकले आहेत, याचा तपास पोलीस करत आहे.
