मधुकर गोंगले, गडचिरोली जिल्हा प्रतिनिधी
गडचिरोली:- येथून एक खळबळजनक घटना समोर आली आहे. येथील सार्वजनिक बांधकाम विभागाच्या विद्युत विभागात कार्यरत असलेल्या सहायक अभियंत्याने कार्यालयातच गळफास घेऊन आत्महत्या केल्याच्या घटनेने सर्विकडे एकच खळबळ माजली आहे. ही घटना मंगळवार दि. 09 दुपारी दीड वाजताच्या सुमारास घडली. केशव गजानन आखाडे वय 27 वर्ष असे मृतक अभियंत्याचे नाव आहे.
गडचिरोली येथील जिल्हा सामान्य रुग्णालयाच्या मागच्या भागात बांधकाम विभागांतर्गत विद्युत विभागाचे कार्यालय आहे. या कार्यालयात केशव आखाडे हा सहायक वीज अभियंता म्हणून कार्यरत होता. मंगळवारी दुपारी कार्यालयात कुणीच नसताना त्याने छताला गळफास लावून आत्महत्या केली, अशी माहिती पोलिसांनी दिली. केशव हा अविवाहित होता.
वाशिम जिल्ह्यातील सिल्लोड येथील मूळ रहिवासी असलेला केशव चार-पाच महिन्यांपूर्वीच महाराष्ट्र लोकसेवा आयोगाची परीक्षा उत्तीर्ण करुन गडचिरोली येथील सार्वजनिक बांधकाम विभागाच्या विद्युत विभागात सहायक अभियंता पदावर रुजू झाला होता, अशी माहिती आहे. मात्र, त्याने आत्महत्या केली. घटनेनंतर पोलिसांनी मर्ग दाखल करुन मृतदेहाचा पंचनामा केला. पोलिस निरीक्षक अरविंदकुमार कतलाम यांच्या मार्गदर्शनाखाली तपास सुरु आहे. वृत्त लिहिपर्यंत केशव आखाडेच्या आत्महत्येचे कारण कळू शकले नाही.
