✒️वैशाली गायकवाड, उपसंपादक (पुणे)
महाराष्ट्र संदेश न्युज ! ऑनलाईन पुणे:- सध्या राज्यात गोवरने थैमान घातले आहे. राज्यात रोज शेकडो गोवर बाधित मुल समोर येत असल्याने नागरीकांचा मनात भीतीच वातावरण निर्माण झाले आहे. मुंबई, नाशिक सह आता गोवरच्या पुण्यातही उद्रेक झाल्याचे समोर आले आहे.
आज पुणे शहरातून 11 गोवर बाधित रुग्ण आढळून आल्याने संपूर्ण पुणे शहरात एकच खळबळ माजली आहे. यामध्ये एकाच भागातून सर्वाधिक गोवरचे रुग्ण आढळून आले आहेत. आरोग्य विभागाच्या माहिती नुसार, पुण्यातील एकाच भागातून सर्वाधिक गोवरच्या रुग्णांची संख्या आढळून आली आहे. शहरातील भवानी पेठेत 11 बालकांना गोवरची लागण झाली आहे. तर संपूर्ण पुणे शहरात आत्तापर्यंत 314 संशयित रुग्ण आढळून आले आहेत.
भवानी पेठ हा पुण्यातील मध्यवर्ती आणि दाट लोकवस्तीचा भाग आहे. कोविड काळात देखील याच भागात सर्वाधिक रुग्णांची नोंद होत होती. गोवर हा देखील संसर्गजन्य आजार असल्यानं अशा दाट वस्तीत या रोगाचा फैलाव लवकर होण्याची शक्यता असते, अशी माहिती आयएमएचे माजी अध्यक्ष डॉ. अविनाश भोंडवे यांनी दिली.
दरम्यान, गोवरच्या या उद्रेकाच्या पार्श्वभूमीवर पुणेकरांनी कुटुंबातील 9 महिने ते 5 वर्षापर्यंत वयोगटातील बालकांना गोवरची लस तातडीने द्यावी, असं आवाहन आरोग्य विभागाकडून करण्यात आलं आहे.
