✒️युवराज मेश्राम, विदर्भ ब्यूरो चीफ
महाराष्ट्र संदेश न्युज ! ऑनलाईन नागपूर:- येथून एक खळबळजनक घटना समोर आली आहे. वेकोलिच्या इंदर कोळसा खाण क्रमांक 6 च्या चेक पोस्टजवळ रविवारी 11 डिसेंबरला आपले कर्तव्य बजावत असणाऱ्या महाराष्ट्र सुरक्षा बलाचा जवानावर गोळीबार करण्यात आला. त्यात त्या जवनाचा उपचारा दरम्यान मृत्यू झाला आहे. मिलिंद खोब्रागडे असे मृत्यू झालेल्या जवानाचे नाव आहे.
रविवारी 11 डिसेंबरला आरोपी समीर सदरुल सिद्दीकी वय 30 वर्ष, अष्टविनायक कॉलनी, टेकाडी ता. पारशिवनी आणि राहुल जोसेफ जेकप वय 26 वर्ष, कांद्री कन्हान, ता. पारशिवनी यांनी गोळ्या झाडल्यामुळे महाराष्ट्र सुरक्षा बलाचा जवान मिलिंद खोब्रागडे गंभीर जखमी झाला होता. दरम्यान, बुधवारी रात्री उपचारादरम्यान त्याचा मृत्यू झाला. मिलिंदच्या मृत्यूमुळे त्याच्या कुटुंबीयात संताप व्यक्त करण्यात येत आहे. गुरुवारी मिलिंदचा मृतदेह मेयो रुग्णालयात शवविच्छेदनासाठी आणण्यात आला. तेथे मिलिंदची पत्नी ग्रीष्माला नोकरी द्यावी, कर्तव्यावर असताना गोळीबारात मृत्यू झाल्यामुळे मिलिंदवर शासकीय इतमामात अंत्यसंस्कार करावा आणि आरोपींना फाशीची शिक्षा द्यावी, अशी मागणी मिलिंदचा भाऊ प्रफुल्ल खोब्रागडे, प्रतिभा खोब्रागडे आणि मिलिंदची पत्नी ग्रीष्माने केली आहे. मृत मिलिंदची पेट्रोलिंगची ड्युटी असताना त्याची चेकपोस्टवर ड्युटी लावण्यात आली. तसेच चेकपोस्टवर चौघांची ड्युटी लावणे गरजेचे असताना एकाचीच ड्युटी का लावली ? याची उच्चस्तरीय चौकशी करण्याची मागणी कुटुंबीयांनी केली. शवविच्छेदनानंतर कुटुंबीय मिलिंदचा मृतदेह घेऊन अकोला जिल्ह्यातील आकोट तालुक्यातील रंभापूर या गावाकडे अंत संस्कार करण्यासाठी रवाना झाले.
आपल्या परिसरातील बातम्या व घडामोडी बघण्याकरीता आजच महाराष्ट्र संदेश न्यूजच्या वेबसाईट www.maharashtrasandesh.com ला भेट द्या. 9766445348/7385445348
