✒️ राज शिर्के, मुंबई प्रतिनधी
मुंबई:- शिवसेनेशी बंडखोरी करून भाजपा बरोबर साथगाठ करून महाराष्ट्राचे मुख्यमंत्री बनलेले एकनाथ शिंदे यांनी राज्यकारभार हाती घेतल्यापासून आता जवळपास दोन महिने झाले आहेत. मात्र या दोनच महिन्यात एकनाथ शिंदेंवर अधिकारी वर्ग नाराज असल्याची चर्चा आहे. शिंदे प्रोटोकॉल पाळत नसल्याने अधिकारी वर्ग त्रस्त आहे.
सूत्रांनी दिलेल्या माहितीनुसार, एकनाथ शिंदेंनी मुख्यमंत्री पदी आल्यापासून त्यांनी कोणताही प्रोटोकॉल पाळलेला नाही, अशी अधिकाऱ्यांची तक्रार आहे. शिंदेंच्या नियोजित दौऱ्याची कोणतीही माहिती मिळत नाही. तसंच नियोजित दौऱ्यात अनेकदा परस्पर फेरफार केली जाते. या बदलाची माहिती पोलीस आणि इतर अधिकाऱ्यांनाही नसते. त्यामुळे सुरक्षेसाठी असलेल्या आणि तैनात असलेल्या पोलिसांनाही ताटकळत उभं राहावं लागतं.
शिवाय, दिलेल्या वेळेत मुख्यमंत्री शिंदे पोहोचत नाही. रात्री उशिरा बैठका, दौरे घेतात. त्यामुळे तो सगळा वेळ अधिकाऱ्यांना काम करत बसावं लागतं. राज्यातलं राजकारण सध्या तापलेलं असल्याने मुख्यमंत्री शिंदेंना कडक सुरक्षा व्यवस्था आहे. मात्र त्यांच्या सततच्या बदलत्या दिनक्रमामुळे अधिकारी वर्ग आता मोठ्या प्रमाणात त्रासला आहे.
