प्रविण जगताप वर्धा उपजिल्हा प्रतिनिधी
महाराष्ट्र संदेश न्युज ! ऑनलाईन वर्धा:- आज सायबर गुन्हेगारी मोठ्या प्रमाणात वाढली आहे. त्यात अनेक शिक्षित महिला आणि पुरुष फसत आहेत. त्यात वर्धा येथील एका महिला डॉक्टरची 1 लाख 18 हजार रुपयाची फसवणूक झाल्याच्या घटनेने खळबळ उडाली आहे.
वर्धा येथील एका महिला डॉक्टरला लष्करातील रुग्ण रुग्णालयात पाठवायचे आहे, असे सांगून एका अनोळखी इसमाने डॉक्टरच्या खात्यावरून 1 लाख 18 हजारांची रोख परस्पर वळती केली. ही घटना शहरातील लक्ष्मीनगर बेद, लेआउट परिसरात घडली. या प्रकरणी डॉक्टरांनी दिलेल्या तक्रारीवरून सायबर पोलिसात गुन्हा दाखल केला आहे.
या महिला डॉक्टर घरी असताना त्यांना अनोळखी मोबाइल क्रमांकावरून फोन आला. वर्धा येथे आर्मी कॅम्प लागल्याची बतावणी करून तेथील रुग्ण रुग्णालयात पाठवायचे आहे, असे सांगितले. यासाठी त्यांच्या व्हॉट्सऍप क्रमांकावर श्रीकांत शर्मा नावाने लेटर पाठविले, डीपीवर लष्करी गणवेशातील फोटो दिसून आल्याने या महिला डॉक्टरने या इसमावर विश्वास दाखवून त्याने मागितलेल्या माहितीप्रमाणे गुगल प्ले चा पिन दिला. पिन क्रमांक देताच त्यांच्या खात्यावरून 1 लाख 18 हजार 169 रुपये कपात झाल्याचा संदेश प्राप्त झाला. त्यानंतर त्यांना फसवणूक झाल्याची माहिती मिळताच त्यांनी या प्रकरणी सायबर पोलिसात गुन्हा दाखल करण्यात आला. याप्रकरणी पोलिसानी पुढील तपास सुरु आहे.
