रविंद्र भदर्गे, जालना जिल्हा प्रतिनिधी
महाराष्ट्र संदेश न्युज ! ऑनलाईन परतूर:- शहरातील परतूर वाटूर रोडवरील साईनाथ मंदिर परिसरातील न्यु माऊली ऑटो पार्ट व गॅरेज या दुकानाला रविवारी रात्री दोन च्या सुमारास आग लागून आगीत संपूर्ण दुकान भस्मसात झाल्याची घटना घडली. आगीत जवळपास २० लाखाच्या वर नुकसान झाल्याची प्राथमिक माहिती आहे.
सतीष बाबुराव सस्ते वय ३५ रा.खांडवी वाडी येथील या सुशिक्षित बेरोजगार युवकांने आठ वर्षांपूर्वी माऊली गॅरेज व ऑटोमोबाइल्स हे दुकान सुरू केले होते. यासाठी १५ लाखाचे कर्ज ही काढले होते. सर्व व्यवस्थित असताना रविवारी रात्री दोन वाजता या दुकानाला आग लागून संपुर्ण दुकान आगीत भस्मसात झाल्याने सस्ते यांच्यावर मोठे संकट कोसळले आहे.
साईनाथ मंदिर परिसरातील छत्रपती शिवाजी महाराज चौक या गजबजलेल्या भागात हे दुकान असून तेथील पोलिस चौकी पासून २०० फुटावर आहे. शॉर्ट सर्किटमुळे आग लागली असल्याचा प्राथमिक अंदाज आहे. या घटनेने अत्यंत कठीण परिस्थितीतून युवकाने उभ्या केलेल्या व्यवसायाची राख रांगोळी झालेली आहे . आगीची माहिती परतूर अग्निशमन दलाला दिल्यानंतर गाडी घटनास्थळी पोहोचली पण तो पर्यंत दुकान आगीत जळून खाक झाले होते. दरम्यान अग्निशमन गाडीच्या अनेक त्रुटीही या निमित्ताने समोर आल्या.
