उषाताई कांबळे सांगली जिल्हा प्रतिनिधी
महाराष्ट्र संदेश न्युज ऑनलाईन सांगली:- येथून एक धक्कादायक घटना समोर आली आहे. येथे अनैतिक संबंधातून कोयत्याने सपासप घाव घालत एका तरुणाची हत्या करण्यात आली आहे. दत्ता शरणाप्पा सुतार वय 30 वर्ष, शिवशंभो चौक, मूळ रा.-इंदिरानगर असे हत्या करण्यात आलेल्या तरुणाचे नाव असून ही घटना शहरालगत असलेल्या कदमवाडी रस्त्यावर घडली.
मिळालेल्या माहितीनुसार, हत्या करण्यात आलेला दत्ता सुतार हा सेंट्रींग कामगार आहे. तो यापुर्वी इंदिरानगर परिसरात राहण्यास होता. गेल्या काही दिवसांपासून शिवशंभो चौकातील एका महिलेशी अनैतिक संबंध होते. त्यामुळे सुतार हा त्या महिलेच्या घरीच राहत होता. त्याच्या बरोबर त्या महिलेचा अल्पवयीन मुलगाही रहात होता. दत्ता सुतार त्या महिलेसोबत किरकोळ कारणातून वाद घालत मारहाणही करत होता. हे सर्व या महिलेचा मुलगा नेहमी बघत होता त्यातून त्याचा राग उफाळत गेला. यापुर्वी देखील भांडण झाले होते. दत्ताचा काटा काढण्याचा कट यापुर्वीही रचण्यात आला होता. पण बुधवार दि.19 फेब्रुवारी रोजी त्याला निर्जनस्थळी गाठत कोयत्याने वार करून त्याची हत्या केली.
हत्या करण्यात आलेल्या दिवशी मृतक दत्ता आणि त्याचा मित्र अतुल ठोंबरे हे कामासाठी सकाळी घरातून बाहेर पडले होते. दुपारी बारा वाजताच्या सुमारास त्या महिलेच्या मुलाने मृतक सुतार याच्याकडे पैशांची मागणी केली. त्याला पैसे देण्यासाठी मृतक सुतार व त्याचा मित्र ठोंबरे हे दोघे दुचाकी MH 9 BQ 4985 ने सांगली वाडीतून कदमवाडी रस्त्यावर गेले. दरम्यान, त्याचवेळी संशयित मुलगा आणि त्याचे दोन साथीदार त्याठिकाणी होते. अनैतिक संबंधाचा राग पुर्वीपासूनच त्या मुलाच्या मनात होता. त्याच रागातून त्याने काटा काढण्याचा कट रचला.
दत्ता दुचाकीवरून त्याठिकाणी आल्यानंतर क्षणात संशयित मुलाने त्याच्या छातीवर दगड मारला. त्यामुळे दत्ता रस्त्यावर पडला. त्यानंतर या मुलाने हातातील कोयत्याने सपासप वार केले. वार इतके वर्मी होते की दत्ता रक्ताच्या थारोळ्यात पडला. या घटनेनंतर त्याचा मित्र ठोंबरे हा तेथून पळून गेला. या हल्ल्यात अतिरक्तस्त्राव झाल्याने दत्ताचा जागी मृत्यू झाला. दरम्यान या घटनेची माहिती मिळताच तातडीने पोलीस घटनास्थळी दाखल झाले. तपासाची चक्र फिरवत एक तासाच्या आत आरोपींना पोलिसांनी ताब्यात घेतले आहे. या घटनेचा अधिक तपास सुरु आहे.
