अनिल अडकिने नागपूर जिल्हा प्रतिनिधी
महाराष्ट्र संदेश न्युज ! ऑनलाईन सावनेर १८ जुन:- सावनेर येथील मुख्याधिकारी निवासस्थानी नुकतेच सुमारे १०,५४,३९३ रुपये खर्चून नुतनीकरण (Renovation) करण्यात आले असल्याची माहिती काही दिवसांपूर्वी उघड झाली होती. या पार्श्वभूमीवर आम आदमी पार्टीचे ज्येष्ठ नेते श्री.संजय टेंभेकर यांच्या नेतृत्वाखाली एक शिष्टमंडळाने सदर निवासस्थानी प्रत्यक्ष भेट देत पाहणी केली.
पाहणीदरम्यान, घराभोवती अस्वच्छता, जंगली झाडांचे वाढलेले प्रमाण,मुख्य प्रवेशद्वाराजवळ साचलेला कचरा, पेंट न उरलेला फलक आदी बाबी निदर्शनास आल्या. पाहणीनंतर हा प्रश्न उपस्थित झाला की इतक्या मोठ्या खर्चानंतर देखील वास्तूची परिस्थिती जर अशी असेल, तर खर्चाच्या पारदर्शकतेबाबत प्रशासनाने खुलासा करावा.
आर टी आय च्या माध्यमातून प्राप्त झालेल्या माहितीनुसार, सदर रिन्यूव्हेशनसाठी मोठा निधी वापरला गेल्याचे समजते. परंतु प्रत्यक्ष स्थिती पाहता, हा निधी नेमका कशा स्वरूपात वापरला गेला, याविषयी जनतेच्या मनात शंका निर्माण होत आहेत. आम आदमी पार्टी या संपूर्ण प्रकरणाची सखोल चौकशी व्हावी अशी अपेक्षा शासनाकडे व्यक्त करते.
या पाहणीदरम्यान आम आदमी पार्टीचे ज्येष्ठ नेते संजय टेंभेकर, तालुका अध्यक्ष पंकज घाटोडे, जिल्हा महासचिव जामुवंत वारकरी, जिल्हा सहसंघटन मंत्री संजय राऊत,शहराध्यक्ष गजूभाऊ चौधरी,तालुका सहसंघटन मंत्री योगेश राऊत, तालुका उपाध्यक्ष मोरेश्वर वाघमारे आदी पदाधिकारी उपस्थित होते.
संजय टेंभेकर यांनी स्पष्टपणे सांगितले की, “जनतेच्या पैशाचा योग्य वापर आणि कामांची पारदर्शकता ही लोकशाही व्यवस्थेची मूलभूत गरज आहे. याबाबत प्रशासनाने लवकरात लवकर खुलासा करावा, हीच जनतेची अपेक्षा आहे.
