आसमा सय्यद पुणे जिल्हा प्रतिनिधी
महाराष्ट्र संदेश न्युज ! ऑनलाईन पुणे:- येथून एक खळबळजनक घटना समोर आली आहे. येथे कौटुंबिक वादातून पत्नीने नांदायला नकार दिल्याच्या कारणातून पतीने आपल्या पत्नीच्या गळ्यावर चाकूने वार करुन तिचा निर्घुण हत्या केल्याची घटना घडली आहे. याप्रकरणी विमानतळ पोलिसांनी दोन तासात पतीला बेड्या ठोकल्या असून ममता प्रेम जाधव वय 21 वर्ष रा. काजळी तांडा, पिंपळगाव, ता. जिंतूर, जि. परभणी असे हत्या झालेल्या महिलेचे नाव आहे. याबाबत ममताची मावशी रेश्मा रामेश्वर राठोड वय 28 रा. खांदवेनगर, लोहगाव यांनी विमानतळ पोलिसांकडे फिर्याद दिली आहे. पत्नीची हत्या करणाऱ्या पती प्रेम उत्तम जाधव वय 27 वर्ष रा. काजळी तांडा, पिंपळगाव, ता. जिंतुर, जि. परभणी याला पोलिसांनी याला अटक केली आहे. ही घटना खांदवेनगर येथे रविवारी दि. 27 दुपारी 3.15 वाजताच्या दरम्यान घडली.
पोलिसांनी दिलेल्या माहितीनुसार, 2020 मध्ये प्रेम आणि ममताचा विवाह झाला होता. प्रेमला दारुचे व्यसन होते. तो तिला सतत त्रास देत होता. म्हणून मागील सहा महिन्यापासून ममता खांदवेनगर लोहगाव येथे आईसोबत राहण्यास आली होती. प्रेम फोन करून ममताला नांदण्यास ये म्हणत होता. परंतू दारु सोडल्याशिवाय नांदण्यास येणार नाही असे ती सांगत होती. ममता तिच्या आईसोबत काम करत होती. तर फिर्यादी मावशी रेश्मा त्यांच्यासोबतच राहत होती.
रविवारी ममता आणि रेश्मा यांची सुट्टी असल्यामुळे त्या घरीच होत्या. दुपारी 3.15 वाजताच्या सुमारास प्रेम हा ममताला घरी घेऊन जाण्यास आला. त्यावेळी त्याच्या हातात पांढऱ्या रंगाची पिशवी होती. तो घरात खुर्चीवर बसला होता. तर ममता बेडवर बसली होती. त्याने ममताच्या चुलत्याला फोन करून तिला नांदण्यास पाठवा असे सांगितले. प्रेम याने त्यानंतर तो फोन ममताच्या मावशीकडे देऊन त्यांना बोलण्यास सांगितले. मावशी फोनवर बोलत खोलीबाहेर आली. दरम्यान, त्यांचा लहान मुलगा घरातून ओरडत बाहेर आला. मावशी रेश्मा यांनी खोलीत जाऊन बघितले असता, प्रेम डाव्या हाताने ममताचे तोंड दाबून उजव्या हाताने चाकूने तिचा गळा चिरत होता. ममताच्या गळ्यातून रक्ताच्या चिळकांड्या उडत होत्या. रेश्मा यांनी प्रेमचा हात पकडून त्याला मागे ओढण्याचा प्रयत्न केला. त्यावेळी त्याने रेश्मा यांच्यावर देखील वार केला. त्याला पकडण्याचा प्रयत्न केला त्यावेळी तो धक्का मारून पळून गेला. ममता रक्ताच्या थारोळ्यात बेडवर पडली होती.
रेश्मा यांनी आरडा-ओरडा केला तेव्हा शेजारी राहणारे काही लोक धावत आले. त्यांनी ममताला रिक्षातून जवळच्या एका खासगी रुग्णालयात दाखल केले. मात्र जखम मोठी असल्याने त्यांनी तिला ससून रुग्णालयात घेऊन जाण्यास सांगितले. त्यांना तात्काळ रुग्णवाहिका मिळाली नाही. रस्त्यावरील एका कार चालकाच्या मदतीने ममताला ससून रुग्णालयात दाखल केले. तेथील डॉक्टरांनी तपासून ममताचा उपचारापूर्वीच मृत्यू झाल्याचे सांगितले.
या घटनेची माहिती मिळताच पोलिस उपायुक्त सोमय मुंंडे, एसीपी प्रांजली सोनवणे, विमातळ पोलिस ठाण्याचे वरिष्ठ पोलिस निरीक्षक गोविंद जाधव, सहायक पोलिस निरीक्षक सपना देवतळे, समीर करपे, पोलिस उपनिरीक्षक नितीन राठोड यांनी घटनास्थळी भेट दिली. त्यानंतर अवघ्या दोन तासात आरोपी पतीला पोलिसांनी अटक केली. पोलिस निरीक्षक (गुन्हे) शरद शेळके पुढील तपास करत आहेत.
