राज शिर्के मुंबई महानगर प्रतिनिधी
महाराष्ट्र संदेश न्युज ! ऑनलाईन मुंबई:- येथून एक खळबळजनक बातमी समोर आली आहे. येथे पोलिसांच्या ताब्यातून एक बांगलादेशी महिला पळाली असल्याची माहिती मिळाली आहे. ती जे.जे. रुग्णालयातून उपचारादरम्यान 21 वर्षीय बांगलादेशी महिला आरोपी पोलिसांना चकवून पसार झाली आहे. तिचं नाव रुबिना इर्शाद शेख असं असून, ती अवैधरित्या भारतात वास्तव्यास असल्याच्या आरोपाखाली नवी मुंबई पोलिसांनी तिला अटक केली होती. तिला भायखळा महिला कारागृहात ठेवण्यात आलं होतं.
पोलिसांनी दिलेल्या माहितीनुसार, अवैधरित्या भारतात वास्तव्यास असलेल्या बांगलादेशी महिलेला सर्दी, ताप, त्वचारोग आणि ती 5 महिन्यांची गर्भावती असल्यामुळे रुबिनाला उपचारासाठी जे जे रुग्णालयात नेण्यात आले होते. यावेळी तिच्या बरोबर महिला पोलिस कॉन्स्टेबल काजल शिंदे या होत्या. मात्र, रुग्णालयातील गर्दीचा फायदा घेत, रुबिना हिने महिला कॉन्स्टेबलच्या हाताला झटका देत रुग्णालयातून पळ काढला. या प्रकरणी कॉन्स्टेबल शिंदे यांनी जेजे मार्ग पोलिस स्टेशन मध्ये रुबिना हिच्या विरुद्ध भारतीय न्याय संहितेच्या कलम 362 अंतर्गत तक्रार दाखल केली आहे.
आरोपी रुबिना शेखवर यापूर्वीच भारतीय न्याय संहिता, पासपोर्ट कायदा आणि परदेशी नागरिक कायद्यान्वये गुन्हे दाखल आहेत. 5 ऑगस्ट रोजी वाशी पोलिसांनी तिला अटक करून न्यायालयीन कोठडीत पाठवलं होतं. सध्या पोलिसांनी फरार आरोपीचा शोध सुरू केला आहे.
