मुकेश चौधरी कार्यकारी संपादक
महाराष्ट्र संदेश न्युज ! ऑनलाईन हिंगणघाट:- तालुक्यातील पोहणा येथील प्राचीन तसेच ऐतिहासिक हेमांडपंथी रुद्रेश्वर देवस्थान विधानसभा क्षेत्राचे आमदार समीर कुणावार यांचे श्रद्धेचे व आस्थेचे देवस्थान आहे, त्यांच्या पुढाकारामुळे यापूर्वीच ‘क वर्ग तीर्थक्षेत्र’ म्हणून या देवस्थानाला मान्यता मिळाली आहे. यानंतर या परिसरात भक्तांच्या सोयीसाठी विविध सुविधा जसे की सौंदर्यीकरण, पथदीप, प्रसाधनगृह व सभागृह उभारण्यात आल्या.
मंदिरात सतत असणारी भक्तांची वर्दळ व धार्मिक महत्त्व लक्षात घेता या देवस्थानाला पुढे ‘ब वर्ग’ दर्जा मिळावा यासाठी आमदार समीर कुणावार यांनी सातत्याने शासनदरबारी पाठपुरावा केला. अखेर आता त्यांच्या प्रयत्नाला यश लाभले असून, शासनाने या प्राचीन रुद्रेश्वर मंदिराला तीर्थक्षेत्राचा ‘ब वर्ग दर्जा’ बहाल केला आहे. अशी माहिती पालकमंत्री पंकज भोयर यांनी दिली.
हेमाडपंथी शैलीतील रुद्रेश्वर मंदिर हे इतिहास, श्रद्धा तसेच स्थापत्यकलेचे अद्वितीय प्रतीक आहे.
मंदिराचे वैभवशाली बांधकाम ५० फुट उंच, ८० फुट लांब, ३६ फुट रुंद रचना, एकाच दगडातून कोरलेली धान्य सामावणारी दुर्मिळ पिंड, तसेच राष्ट्रकुटकालीन चतुर्मुख ब्रह्मदेवाची मूर्ती या सर्व गोष्टी या देवस्थानाला विशेषत्व प्रदान करतात. इतिहासतज्ञांच्या मते हे मंदिर सुमारे १००० ते १२०० वर्षांपूर्वीचे असल्याचे सांगण्यात येते.
“या निर्णयामुळे केवळ देवस्थानाचा गौरवच वाढला नाही, तर पोहणा गावाला धार्मिक पर्यटनाच्या नकाशावर महत्त्वाची ओळख लाभली आहे. भविष्यात येथे आणखी भक्तांची गर्दी वाढेल, स्थानिक व्यवसाय व पर्यटन क्षेत्राला चालना मिळेल व शहराचे सांस्कृतिक व धार्मिक महत्त्व अधिक दृढ होईल”, असे मनोगत आमदार समीर कुणावार यांनी यावेळी व्यक्त केले.
