मुकेश चौधरी कार्यकारी संपादक
महाराष्ट्र संदेश न्युज ! ऑनलाईन हिंगणघाट:-“स्वच्छतेचा मंत्र देणारे महामानव राष्ट्रसंत गाडगेबाबा यांच्या विचारांची आज समाजाला नितांत गरज आहे,” असा सूर हिंगणघाट येथील वणा नदीच्या तीरावरील सहस्रलिंगाच्या पवित्र परिसरात उमटला. श्री संत गाडगेबाबा यांच्या ६९ व्या पुण्यतिथीनिमित्त आयोजित ‘यात्रा महोत्सवा’त अनुयायांची मोठी मांदियाळी पाहायला मिळाली.
पवनपाल महाराज वडाळकर या महोत्सवाचे मुख्य आकर्षण: सत्यपाल महाराज यांचे शिष्य, सप्त खंजिरी वादक पवनपाल महाराज वडाळकर (अकोला) यांचा जाहीर कीर्तनाचा कार्यक्रम. आपल्या अमोघ वाणीतून आणि खंजिरीच्या खणखणाटात त्यांनी समाजातील अनिष्ट रूढी-परंपरांवर प्रहार केला. व्यसनमुक्ती, शिक्षण आणि स्वच्छतेचे महत्त्व पटवून देताना त्यांनी उपस्थितांना गाडगेबाबांच्या जीवनकार्याची प्रचिती दिली.
२० डिसेंबरपासून सुरू झालेल्या या अखंड हरिनाम सप्ताहात दररोज हरिपाठ, भजन व काकड आरतीचे आयोजन करण्यात आले होते. दररोज सकाळी मोरेश्वर कोडापे (डाग), प्रभाकर भोयर,गोपाल भोयर व संच यांनी हरीपाठ केला, तर रविवार (ता.२८) मोहन महाराज गंडाईत यांच्या गोपाळकाल्याच्या कीर्तनानंतर हजारो भाविकांनी महाप्रसादाचा लाभ घेतला.
यात्रेचे विशेष आकर्षण म्हणजे वणा नदीच्या पात्रात सजलेला भव्य ‘आनंद मेळा’. यात्रा कमिटीने अत्यंत नियोजनबद्ध पद्धतीने दुकानांची मांडणी केली होती. यामध्ये बालगोपाळांसाठी विविध प्रकारचे मोठे पाळणे आणि नाविन्यपूर्ण खेळणी मुलांच्या आकर्षणाचे केंद्र ठरले.चटपटीत खाद्यपदार्थांच्या गाड्या आणि हॉटेलची शिस्तबद्ध मांडणी करण्यात आली होती. यात्रेकरूंना चालताना त्रास होऊ नये, यासाठी दुकानदारांना २५ डिसेंबरपूर्वीच जागा नेमून देऊन शिस्त पाळण्याचे आवाहन करण्यात आले होते, ज्याचा सकारात्मक परिणाम यात्रेत दिसून आला.
कर्तृत्ववान व्यक्तींचा गौरव: या कार्यक्रमादरम्यान शहराच्या स्वच्छतेसाठी आणि नियोजनासाठी सदैव तत्पर असलेले नगर परिषदेचे मुख्याधिकारी प्रशांत उरकुडे यांचा त्यांच्या उल्लेखनीय प्रशासकीय कार्याबद्दल गौरव करण्यात आला. तसेच, गाडगेबाबांच्या समाधी स्थळाचे अत्यंत सुबक आणि दर्जेदार बांधकाम करणारे कंत्राटदार श्री. डुकरे यांचाही स्मृतीचिन्ह देऊन यथोचित सत्कार करण्यात आला.
स्वच्छता आणि वृक्षारोपणाचा संदेश वणा नदी संवर्धन समिती आणि ‘संत गाडगेबाबा कल्याणकारी मंडळ, पतंजली योग परिवार चे वसंत पाल गुरुजीयाच्या टिमने आणि विविध सामाजिक संघटना तर्फे नदी स्वच्छता अभियान राबवण्यात आले. नगर परिषद स्वास्थ्य विभागाचे अनिल थाटे कर्मचारी यांनी सात दिवस परिसर स्वच्छ ठेवले. “झाडे लावा, झाडे जगवा” आणि “स्वच्छ ठेवा नदी किनारे” असा संदेश देणारे श्री संत गाडगेबाबांच्या वेशभूषा धारण केलेले श्री जेसवानी संपूर्ण परिसरात लक्ष वेधून घेत होते.
या महोत्सवाच्या यशस्वीतेसाठी अध्यक्ष पुंडलिक भेंडे, तुषार हवाईकर, मंगेश वणिकर, अशोक मोरे, रुपेश लाजुरकर, लक्ष्मण बालपांडे, सचिन मोरे, शंकर मोरे, गोपाल जोडांगडे, कुणाल रघाटाटे, पुरुषोत्तम डफ, जनार्दन बाचलकर, देवा शेंडे, शेख अब्बास, प्रणय बालपांडे, छगन मोरे, सुरेश निमरे यात्रा कमिटीच्या सर्व पदाधिकाऱ्यांनी आणि हिंगणघाटच्या नागरिकांनी मोलाचे सहकार्य केले.
