अनिल अडकिणे नागपूर जिल्हा प्रतिनिधी
महाराष्ट्र संदेश न्युज ! ऑनलाईन नागपूर:- रविवारी पहाटेच्या सुमारास नागपूर जिल्ह्यातील सावनेर जवळ असलेल्या भागीमहारी टोल नाक्यावर डीआरआयने एका ट्रकमधून 522 किलो गांजा जप्त केल्याने एकच खळबळ उडाली आहे. हा गांजा ओडिशा राज्यातून मध्यप्रदेशच्या दिशेने कुलर, पंखे, ब्लँकेट, जॅकेट भरलेल्या ट्रकमधून जात होता. या गांजाची बाजार भावानुसार किंमत 2 कोटी 61 लाख रुपये असल्याचे सांगण्यात आले.
ओडिशा राज्यातून छत्तीसगड व महाराष्ट्र मार्गे मध्यप्रदेशात गांजाची मोठी खेप पाठवली जात असल्याची माहिती डीआरआयला मिळाली होती. त्यामाहितीच्या आधारावर रविवारी पहाटे 5.00 वाजताच्या सुमारास सावनेर परिसरात पथकाने राष्ट्रीय महामार्गावर सापळा रावला. भागीमहारी टोल प्लाझावर संशयित ट्रक MP 04 GB 3859 येताच तो थांबवून झडती घेण्यात आली. यावेळी या ट्रक मध्ये कूलर, पंखे, ब्लँकेट आणि जॅकेट्स असा माल बाहेरून दिसत होता. मात्र, याच साहित्याच्या आड मोठ्या शिताफीने हा गांजा लपवण्यात आला होता. यावेळी ट्रकचालक आणि त्याच्या साथीदाराला अटक केली गेली. ते दोघेही ओडिशाचे रहिवासी असल्याची माहिती आहे.
मोठे तस्करीचे नेटवर्क उघड होणार: ओडिशातून मोठ्या प्रमाणावर गांजाची तस्करी विविध राज्यांत केली जाते. अटकेत असलेल्या आरोपींकडून चौकशीदरम्यान या आंतरराज्यीय तस्करी नेटवर्कचे धागेदोरे उघड होण्याची दाट शक्यता आहे. डीआरआयचे पथक सध्या या प्रकरणात सखोल तपास करत असून, आणखी अटक होण्याची शक्यता नाकारता येत नाही. उल्लेखनीय म्हणजे, काही दिवसांपूर्वीच डीआरआयने वर्धा जिल्ह्यातील कारंजा घाडगे येथे शेकडो किलो एमडी जप्त केले. त्या कारवाईत सुमारे 200 कोटी रुपयांचा अमली पदार्थ साठा उद्ध्वस्त करण्यात आला होता.
