✒️प्रविण जगताप, हिंगणघाट प्रतिनिधी
मो . 9284981757
महाराष्ट्र संदेश न्युज ! ऑनलाईन वर्धा:- जील्हाचे जिल्हाधिकारी राहुल कर्डिले व जिल्हा पोलिस अधीक्षक नूरूल हसन यांनी आज आष्टी येथे तहसिल कार्यालयास संयुक्त भेट दिली. या भेटीत त्यांनी तालुक्यातील आगामी होऊ घातलेल्या ग्रामपंचायत निवडणूकीच्या तयारीचा यावेळी आढावा घेतला. या भेटीदरम्यान उपविभागीय पोलिस अधिकारी सुनील साळुंखे, तहसीलदार सचिन कुमावत, सहाय्यक पोलिस निरिक्षक लक्ष्मण लोकरे यांच्यासह महसूल व पोलिस विभागाचे अधिकारी उपस्थित होते.
वर्धा जिल्ह्यात आगामी 113 ग्रामपंचायतीच्या सरपंच व सदस्य पदासाठी दि.18 डिसेंबर रोजी निवडणूक होत आहे. यात आष्टी तालुक्यातील खडका, बोरगाव टुमणी, देलवाडी, द्रुगवाडा, धाडी व मोई या सहा ग्रामपंचातींचा समावेश आहे.
यावेळी जिल्हाधिकाऱ्यांनी निवडणूक तयारीच्या अनुषंगाने मतदान साहित्य, मतदार यादी, मतदान केंद्र व तेथील तयारी, केंद्रावर नियुक्त करावयाचे कर्मचारी, त्यांचे प्रशिक्षण, निवडणूक प्रक्रीया शांततेत पार पाडण्यासाठी पोलिस विभागाचे नियोजन, निवडणूक संपल्यानंतर मतमोजणी आदींची सविस्तर माहिती घेतली व आवश्यक सुचना संबंधित अधिकारी, कर्मचाऱ्यांना केल्या.
निवडणूक प्रक्रीया पार पडल्यानंतर मतदान यंत्र एका विशिष्ठ आणि नियोजित ठिकाणी सुरक्षित ठेवल्या जातात. त्यासाठी तयार करण्यात आलेल्या स्ट्रॉंगरूमची पाहणी देखील जिल्हाधिकारी व जिल्हा पोलिस अधीक्षकांनी केली. या भेटीदरम्यान तहसील कार्यालयामध्ये मतदानासाठी तयार होत असलेले आणि एफएलसी करत असलेले ईव्हीएम मशिनची प्रक्रिया देखील जिल्हाधिकाऱ्यांनी पाहिली.
यावेळी तहसिलदार सचिन कुमावत यांनी निवडणूकीच्या अनुषंगाने तालुका प्रशासनाने केलेल्या तयारीची माहिती यावेळी दिली. भेटीदरम्यान तहसील कार्यालयामध्ये उपस्थित असलेल्या पत्रकार बांधवांशी जिल्हाधिकारी आणि पोलिस अधिक्षकांनी चर्चा केली.
